出埃及記 12 - 現代台語譯本漢字版

𨃟過節

¹ 上主佇埃及地對摩西及亞倫講：

² 「恁著用此個月做恁的正月，做逐年的頭一個月。

³ 恁著對以色列的全體會眾講：『此個月初十，逐個人著照家庭準備羊仔，一家一隻。

⁴ 若厝裡的人少，一隻羊仔食𣍐了，著及隔壁厝邊做夥準備；照人數，照逐個人食的份量準備。

⁵ 恁著對綿羊抑是山羊選一隻一歲、無缺點的公的羊。

⁶ 恁著給羊仔留到本月十四；佇黃昏的時，以色列全體會眾著刣羊仔。

⁷ 𪜶著提一寡血，抹佇𪜶食羊仔彼間厝雙旁的門徛及門楣。

⁸ 彼暗著食羊仔的肉；肉用火烘，及無酵餅、苦菜做夥食。

⁹ 𣍐用得食生的及用水煮的；肉著及頭、腳、腹內做夥烘來食。

¹⁰ 諸個攏毋通留到隔早起；若留到隔早起，著用火燒掉。

¹¹ 恁食的時，腰著縖啲，鞋著穿啲，手著攑柺仔，嘛著趕緊食。這是上主的𨃟過節。

¹² 「『彼暝，我欲行透埃及地，拍死所有的頭上生的，無論是人抑是牲生；閣欲審判埃及所有的神明。我是上主。

¹³ 恁若有佇恁的厝抹血做記號；我一下看著此個血，就會對恁遐𨃟過去；我拍埃及地的時，毀滅的災難𣍐臨到恁。』」

除酵節

¹⁴ 恁著會記得此日是上主的節日，代代守此個節日做永遠的規例。

¹⁵ 恁著食無酵餅七日；頭一日著對厝內將酵母清清氣。對頭一日到第七日，所有食有酵的物的人，攏著對以色列人的中間革出。

¹⁶ 頭一日及第七日，恁著舉行聖會；此兩日，準備食的物件以外，其他的工作恁攏𣍐用得做。

¹⁷ 恁著守除酵節，因為佇此日我導恁的軍隊對埃及地出來；所以恁著守此日做世世代代永遠的規例。

¹⁸ 對正月十四下昏到二一下昏，恁著食無酵餅。

¹⁹ 此七日內，恁逐個人的厝內𣍐用得有酵；食有酵的物的人，無論是恁的同胞抑是外族人，攏著對以色列會眾的中間革出。

²⁰ 有酵的物，恁攏𣍐用得食；佇此個節期內，恁無論住佇什麼所在，著食無酵餅。

設立𨃟過節

²¹ 摩西召集以色列所有的長老，對𪜶講：「恁著為恁的家族揀羊仔，刣來過𨃟過節。

²² 著提一把牛膝草，搵盆內的血，抹門楣及雙旁的門徛；天光以前，無論什麼人攏毋通出門。

²³ 上主欲行透全國，拍死埃及人；伊看著門楣及雙旁門徛的血，就會𨃟過彼個門，不准毀滅者入恁的厝給恁拍死。

²⁴ 恁著遵守此個規定，做恁及恁的後代永遠的規例。

²⁵ 將來恁進入上主所應允欲賜互恁彼個地，恁著遵守此個規例。

²⁶ 恁的子兒若問恁：『是按怎欲守此個規例？』

²⁷ 恁著講：『這是獻互上主𨃟過節的祭物。上主拍死埃及人的時，伊𨃟過住佇埃及的以色列人的厝，解救咱逐個家族。』」人民就仆佇土腳敬拜上主。

²⁸ 然後，以色列人離開，照上主對摩西及亞倫的命令去做。

10. 頭上生的受刣

²⁹ 佇半暝，上主刣死埃及地所有頭上生的；對坐王位的埃及王的大子到關佇監獄的犯人的大子，以及牲生的頭上生的，攏受刣死。

³⁰ 埃及王及伊所有的人臣，以及全部的埃及人，攏佇半暝起來；佇埃及全地有大啼哭的聲，因為無一家無死人。

³¹ 埃及王半暝召摩西、亞倫來，講：「出去！恁及以色列人著離開我的人民出出去！照恁所講的，去敬拜上主；

³² 嘛照恁的要求，連牛群羊群攏帶帶去。毋拘恁著給我祝福。」

³³ 埃及人趕以色列人著趕緊離開，講：「阮攏啲欲死啦。」

³⁴ 以色列人就提猶未囥酵的麵丸，下佇抄麵粉的器具內，用衫包起來，囥佇肩頭頂。

³⁵ 以色列人照摩西的話，對埃及人討金器、銀器，及衣服。

³⁶ 上主互以色列人得著埃及人好的對待，𪜶要求什麼，埃及人攏互𪜶。按呢，𪜶就搶奪埃及人的財物。

以色列人出埃及

³⁷ 以色列人離開蘭塞，向疏割出發，囝仔婦仁人無算，行路的壯丁大約有六十萬。

³⁸ 閣有真多混雜的群眾，以及牛群、羊群、真多牲生及𪜶做夥出去。

³⁹ 𪜶用對埃及帶出來無發酵的麵丸烘做餅，因為𪜶受趕離開埃及，真緊急，𣍐當為家己準備食物。

⁴⁰ 以色列人住佇埃及四百三十年久。

⁴¹ 四百三十年一下滿，抵抵彼日，上主導伊的軍隊對埃及地出來。

⁴² 此暝上主歸暝顧守𪜶，導𪜶出埃及地；以色列人著世世代代佇此暝向上主守夜。

𨃟過節的規例

⁴³ 上主對摩西、亞倫講：「𨃟過節的規例是按呢：𨃟過節的食物，外族人攏毋通食，

⁴⁴ 毋拘用銀買來的奴隸，若有受割禮就通食；

⁴⁵ 寄居的及倩來的工人攏毋通食。

⁴⁶ 著佇厝內食，連一塊都毋通提出去外面；羊仔的骨連一支都毋通摃斷。

⁴⁷ 以色列所有的會眾攏著按呢守節。

⁴⁸ 若有寄居佇恁中間的外族人，愛欲守𨃟過節敬拜上主，𪜶家內的查甫人著受割禮，才通及本族的人仝款守節；毋拘無受割禮的外族人攏𣍐用得食。

⁴⁹ 本族人及寄居佇恁中間的外族人，像款攏著守此個規例。」

⁵⁰ 以色列眾人就照上主命令摩西、亞倫的話去做。

⁵¹ 就佇彼日，上主導以色列人，一隊一隊出埃及。