出埃及記 11 - 現代台語譯本漢字版

第十個災難的警告

¹ 上主對摩西講：「我欲閣降一個災難互埃及王及埃及，後來伊才會放恁離開遮；伊放恁離開的時，會逼恁趕緊對遮出去。

² 你著給以色列人講，無論男女，逐個人攏著對𪜶的厝邊討金器、銀器。」

³ 上主互以色列人得著埃及人的好款待；閣摩西此個人佇埃及地，嘛受埃及王的人臣及人民看做偉大。

⁴ 摩西講：「上主按呢講：『下昏暗半暝，我欲佇埃及地行透透。

⁵ 所有埃及地的大子，對坐王位的埃及王到挨磨的女婢的大子，以及攏總頭上生的牲生，攏會死。

⁶ 埃及全地欲有哀傷啼哭的聲，以前毋曾有，將來嘛𣍐閣有。

⁷ 毋拘佇以色列人的地區會真平靜，連狗仔都𣍐給人抑是牲生吠；按呢欲互恁知，上主有分別埃及人及以色列人。』

⁸ 你所有的人臣欲來見我，仆佇我的面前，講：『拜託你及跟隨你的人民攏離開。』後來我才欲離開。」講煞，摩西氣沸沸離開埃及王出去。

⁹ 上主曾對摩西講：「埃及王𣍐聽你的話，所以我欲佇埃及地行閣較多的神跡。」

¹⁰ 摩西及亞倫佇埃及王的面前行這一切的奇事；毋拘上主互埃及王的心硬，毋放以色列人離開伊的地。