出埃及記 10 - 現代台語譯本漢字版

8. 草蜢的災難

¹ 上主對摩西講：「你去見埃及王。我欲互伊及伊的人臣的心硬，通互我佇𪜶中間行神跡；

² 嘛欲互你對恁的子、恁的孫講起我按怎戲弄埃及人，以及我佇𪜶中間行的神跡，互恁知我是上主。」

³ 摩西及亞倫就去見埃及王，對伊講：「上主 — 希伯來人的上帝按呢講：『你到今猶毋肯佇我的面前屈服。著放我的子民出去，互𪜶通敬拜我。

⁴ 你若毋肯放我的子民離開，明仔載，我欲互草蜢進入你的境內；

⁵ 𪜶欲遮蓋地面，致到人看𣍐著地；𪜶閣欲食冰雹拍賰留互恁的，嘛欲食野地的樹木。

⁶ 你的王宮、你的人臣及所有埃及人的厝，一四界攏有草蜢；自古以來，毋曾有人看著按呢。』」講了，摩西就越轉身，離開埃及王出去。

⁷ 埃及王的人臣對王講：「此個人尋麻煩害咱欲到底時？著放此個民族去敬拜上主 — 𪜶的上帝。埃及已經啲欲滅亡啦，你豈毋知？」

⁸ 對按呢，埃及王召摩西及亞倫倒轉來，對𪜶講：「恁通去敬拜上主 — 恁的上帝，毋拘是什麼人欲去？」

⁹ 摩西講：「阮攏欲去；阮的少年人及老人、阮的後生查某子、阮的牛群羊群攏欲做夥去；因為阮著守節敬拜上主。」

¹⁰ 埃及王對𪜶講：「去啊，我若放恁的囝仔及婦仁人隨恁去，願上主給恁保庇啦！恁著知，災禍已經佇恁的目睭前。

¹¹ 毋拘𣍐用得！我干焦准恁查甫人去敬拜上主，恁本來就是按呢要求。」埃及王就給𪜶趕出去。

¹² 上主給摩西講：「你伸手指埃及地，互草蜢蓋滿全國，食冰雹拍賰的植物。」

¹³ 摩西攑伊的柺仔指埃及地，上主就互東風歸暝歸日吹埃及地；到隔日早起，東風將草蜢吹來。

¹⁴ 草蜢侵犯埃及全地，歇佇埃及四境；草蜢即呢多，數量空前絕後。

¹⁵ 草蜢遮蓋地面，致到全地攏烏暗；𪜶閣食地上所有互冰雹拍賰的菜蔬及樹頂的果子。埃及全地，無論樹木，抑是園裡的菜蔬，連一屑仔青翠的物都無留啲。

¹⁶ 埃及王趕緊叫摩西及亞倫來，講：「我有得罪上主 — 恁的上帝，嘛得罪恁。

¹⁷ 今，請恁祈求上主 — 恁的上帝，閣一遍赦免我的罪，互我脫離此遍致到死亡的災難。」

¹⁸ 摩西就離開埃及王，去祈求上主。

¹⁹ 上主就透真強的西風，將草蜢吹落去紅海；埃及四境連一隻草蜢都無留啲。

²⁰ 毋拘上主互埃及王的心硬，毋放以色列人離開。

9. 烏暗的災難

²¹ 上主閣給摩西講：「你伸手指天，互烏暗遮蓋埃及地，暗甲著用摸的才會行得。」

²² 摩西伸手指天，埃及全地就三日久烏烏暗暗；

²³ 三日久人互相看𣍐著，嘛𣍐當離開厝；毋拘以色列人住的所在攏有光明。

²⁴ 埃及王就叫摩西來，講：「恁去敬拜上主，恁的囝仔及婦仁人嘛通及恁做夥去，毋拘恁的牛群羊群著留落來。」

²⁵ 摩西應伊講：「你著將祭物及燒化祭的物互阮，互阮通向上主 — 阮的上帝獻祭。

²⁶ 阮的牲生嘛著及阮去，連一隻都𣍐當留啲，因為阮猶毋知著用什麼牲生服事上主 — 阮的上帝；到遐阮才會知。」

²⁷ 毋拘上主互埃及王的心硬，毋肯放𪜶離開。

²⁸ 埃及王給摩西講：「你給我出去！你著細膩，毋通閣互我看著；互我看著彼日，你會死。」

²⁹ 摩西講：「照你講的，我無欲閣見你的面。」