出埃及記 1 - 現代台語譯本漢字版

以色列人生湠真多

¹ 雅各的子兒逐個導𪜶的家眷，及雅各做夥來到埃及，𪜶的名是：

² 呂便、西緬、利未、猶大、

³ 以薩迦、西布倫、便雅憫、

⁴ 但、拿弗他利、迦得，及亞設。

⁵ 雅各的後代攏總七十人；約瑟已經佇埃及。

⁶ 約瑟及伊的兄弟，以及𪜶彼代的人攏死。

⁷ 毋拘以色列人生湠真多，非常強盛，遍滿彼個地。

以色列人受迫害

⁸ 後來，埃及有毋識約瑟的新的王起來統治。

⁹ 伊給伊的人民講：「看咧，以色列民族比咱較多，閣較強；

¹⁰ 咱著想一個好辦法來對付𪜶，才免𪜶人口加添，戰爭發生的時，聯合咱的對敵給咱攻擊，離開此個地。」

¹¹ 埃及人就派督工管轄𪜶，強迫𪜶做苦工壓迫𪜶，互𪜶佇比東及蘭塞為埃及王起囤積物資的城。

¹² 毋拘埃及人愈給𪜶壓迫，𪜶人口愈多，擴展愈闊。對按呢，埃及人愈驚以色列人。

¹³ 埃及人強迫以色列人做苦工，

¹⁴ 互𪜶生活困苦；無論抄黏土，做磚，抑是佇野地做工，埃及人攏嚴轄對待𪜶。

¹⁵ 埃及王命令希伯來的產婆，一個叫做施弗拉，一個叫做普阿，

¹⁶ 講：「恁給希伯來的婦仁人接生，𪜶欲生的時，恁若看著查甫的，著互伊死；若是查某的，就互伊活。」

¹⁷ 毋拘產婆敬畏上帝，無照埃及王的命令去做；𪜶留查甫嬰仔的性命。

¹⁸ 埃及王叫產婆來，給𪜶講：「恁是按怎留查甫嬰仔的性命？」

¹⁹ 產婆對埃及王講：「希伯來婦仁人及埃及婦仁人無仝款；𪜶較勇，產婆猶未到，𪜶就生啦。」

²⁰ 上帝好款待此兩個產婆；以色列民族人口愈多，愈強盛。

²¹ 此兩個產婆敬畏上帝，上帝就互𪜶建立家庭。

²² 埃及王命令所有的人民講：「著給希伯來人生的查甫嬰仔擲落去尼羅河，干焦互𪜶的查某嬰仔活啲。」