使徒行傳 6 - 現代台語譯本漢字版

選七個執事

¹ 過無偌久，門徒的人數一直加添，講希臘語的猶太人埋怨許個講希伯來語的猶太人，因為佇分配日常生活的需要有忽略𪜶的寡婦。

² 十二使徒就召集全體門徒，對𪜶講：「阮將宣講上帝信息的工作放下啲，去管分配日常生活的需要無合。

³ 所以，兄弟啊，著對恁中間選七個有好名聲，受聖神充滿，閣有智慧的人，阮通任命𪜶辦理此個代誌。

⁴ 阮欲專心佇祈禱及傳道的工作。」

⁵ 使徒的意見得著全會眾贊成，𪜶就選司提反，伊是充滿信心及聖神的人；閣選腓力、伯羅哥羅、尼迦挪、提門、巴米拿，及改宗入猶太教的安提阿人尼哥拉。

⁶ 𪜶互諸個人徛佇使徒面前，使徒就為著𪜶祈禱，給𪜶按手。

⁷ 上帝的信息繼續傳開；佇耶路撒冷門徒的人數加添真多，閣有真多祭司嘛聽趁此個信仰。

司提反受掠

⁸ 司提反充滿恩賜及能力，佇民眾的中間行大奇事及神跡。

⁹ 不過有一寡人起來及司提反辯論，𪜶是對古利奈及亞歷山大來，屬「自由人」會堂的會員，以及對基利家及亞細亞來的人。

¹⁰ 聖神賜智慧互司提反，互𪜶無法度通辯駁。

¹¹ 後來，𪜶買收一寡人出來講：「阮曾聽著伊講誹謗摩西及褻瀆上帝的話。」

¹² 𪜶煽動民眾、長老，及經學教師，衝去掠司提反，給伊交互議會。

¹³ 𪜶叫一寡假證人出來，講：「此個人不時講話攻擊此個聖殿及摩西的律法。

¹⁴ 阮曾聽著伊講，此個拿撒勒人耶穌欲毀壞此個聖殿，閣改變摩西傳互咱的規例。」

¹⁵ 彼時坐佇議會的人攏注目看司提反，看著伊的面親像天使的面貌。