使徒行傳 4 - 現代台語譯本漢字版

彼得及約翰佇議會受審問

¹ 彼得及約翰對群眾啲講話的時，有祭司、聖殿的守衛官，及撒都該派的人來。

² 𪜶非常受氣，因為此兩個使徒啲教示眾人，根據耶穌的閣活宣講死人閣活的事。

³ 𪜶就掠此兩個使徒，給𪜶拘留到隔日，因為天已經暗。

⁴ 聽著信息的有真多人信，查甫人的人數差不多有五千。

⁵ 隔日，猶太人的領袖、長老，及經學教師聚集佇耶路撒冷。

⁶ 大祭司亞那及該亞法、約翰、亞歷山大，及大祭司的家族嘛攏佇遐。

⁷ 𪜶叫使徒來徛佇𪜶中間，問講：「恁靠什麼權能，奉什麼名，做此項代誌？」

⁸ 彼時彼得受聖神充滿，應講：「各位民間的領袖及長老，

⁹ 阮今仔日若是為著互此個腳跛的人得著醫好此項好事受查問，

¹⁰ 恁大家及所有以色列人攏著知，此個人完全勇健徛佇恁面前，是靠拿撒勒人耶穌基督的名。此位耶穌，恁給伊釘十字架，毋拘上帝互伊對死人中閣活。

¹¹ 伊就是聖經所講： 恁諸個起厝師傅所棄拺的石， 已經成做上重要的基石。

¹² 耶穌以外攏無拯救，因為佇天下人間，上帝無賜別個名互咱通倚靠來得救。」

¹³ 議會的議員看著彼得及約翰赫呢勇敢，知𪜶是無讀冊的普通人，就真著驚，閣認得𪜶曾及耶穌做夥，

¹⁴ 嘛看著彼個得著醫好的人徛佇𪜶身邊，就無話通反駁。

¹⁵ 議員就叫𪜶離開議會，然後參詳

¹⁶ 講：「咱著按怎來對付諸個人？𪜶所行此個奇異的神跡，住佇耶路撒冷的人攏知，咱無法度否認。

¹⁷ 毋拘為著欲避免此個代誌佇民間愈傳愈闊，咱著警告𪜶對什麼人都毋通閣奉耶穌的名講論。」

¹⁸ 後來，𪜶叫彼兩個使徒來，命令𪜶𣍐用得閣奉耶穌的名講論抑是教示。

¹⁹ 毋拘彼得及約翰應講：「聽趁恁才著抑是聽趁上帝才著，佇上帝面前恁家己判斷。

²⁰ 阮所看著所聽著的，𣍐當無講。」

²¹ 許個議員毋知著按怎給𪜶處罰，就嚴嚴給𪜶警告，了後放𪜶去，因為民眾攏啲為著所發生的代誌歸榮光互上帝。

²² 對此個神跡得著醫好彼個人已經四十外歲。

信徒求主賜勇氣

²³ 彼得及約翰受解放，就倒去同伴遐，將祭司長及長老給𪜶講的話攏對𪜶報告。

²⁴ 𪜶聽了就同心大聲對上帝祈禱講：「創造天、地、海，及其中萬物的主宰，

²⁵ 你曾通過聖神用你的僕人阮的祖先大闢的嘴講： 外邦是按怎哄喝？ 萬民是按怎計謀無效果的事？

²⁶ 地上的君王攏排陣欲交戰； 統治者聯合起來， 欲攻擊主及伊選立的基督。

²⁷ 希律及龐修‧彼拉多果然佇此個城內及外邦人以及以色列人聯合來攻擊你所選立聖的僕人耶穌。

²⁸ 𪜶聚集欲做你的權能及你的旨意預定會發生一切的事。

²⁹ 今主啊，𪜶啲給阮恐嚇，求你監察，互你的僕人閣較有勇氣通宣講你的信息。

³⁰ 求你伸手醫治，閣通過你聖的僕人耶穌的名互阮行神跡奇事。」

³¹ 祈禱煞，聚會的所在搖動；𪜶攏受聖神充滿，勇敢宣講上帝的信息。

財物公家用

³² 全體信徒攏同心合意，無一個人講伊的財物是家己的；所有的物件公家用。

³³ 使徒用大能力見證主耶穌的閣活，眾人攏得著大恩典。

³⁴ 𪜶中間無人有欠缺，因為有田園厝宅的人攏賣出去，

³⁵ 所得著的錢提來交互使徒，照逐個人的需要分配。

³⁶ 有一個出世佇塞浦路斯的利未人約瑟，使徒給伊叫做巴拿巴，意思就是安慰者。

³⁷ 伊賣家己的田園，錢提來交互使徒。