使徒行傳 3 - 現代台語譯本漢字版

彼得及約翰醫好腳跛的人

¹ 有一日，下晡時三點祈禱的時間，彼得及約翰上聖殿。

² 有一個出世腳就跛的人，逐日互人扛來下佇聖殿彼個叫做「媠門」的門口，通對入聖殿的人求乞。

³ 伊一下看著彼得及約翰啲欲入去聖殿，就求𪜶捨施。

⁴ 彼得及約翰注目給伊看，彼得對伊講：「看阮！」

⁵ 伊就注神看𪜶，看會當對𪜶得著什麼。

⁶ 彼得對伊講：「金銀我攏無，我將我所有的互你。我奉拿撒勒人耶穌基督的名命令你，起來行！」

⁷ 然後彼得牽伊的正手，給伊扶起來。伊的腳及腳目隨時有力，

⁸ 就跳起來徛啲，閣行，及𪜶做夥進入聖殿，那行那跳，那謳咾上帝。

⁹ 眾人看著伊那行那頌讚上帝，

¹⁰ 閣認得伊是平常坐佇「媠門」的門口啲求乞彼個人，就對佇伊身上所發生的代誌感覺真奇怪著驚。

彼得佇聖殿宣講信息

¹¹ 佇所羅門走廊，彼個得著醫好的人給彼得及約翰扭牢牢，眾人大奇怪，攏走倚來。

¹² 彼得看著許個人，就給𪜶講：「以色列人，恁是按怎對此項代誌感覺奇怪？是按怎注目看阮，想講阮是靠家己的能力抑是虔誠互此個人起來行？

¹³ 亞伯拉罕、以撒、雅各的上帝，就是咱祖先的上帝，已經互伊的僕人耶穌得著榮光。此位耶穌恁給伊交互官府；彼拉多決定欲放伊的時，恁當場拒絕。

¹⁴ 恁拒絕彼位聖閣公義的，要求彼拉多放一個殺人犯互恁。

¹⁵ 恁刣死活命的源頭，就是上帝互伊對死人中閣活彼位。阮是此個代誌的見證人。

¹⁶ 對信靠此個名，就是耶穌的名，恁所看見所識此個腳跛的人，有得著氣力。對耶穌所賜的信心，此個人完全好起來。此項代誌恁大家攏有看著。

¹⁷ 「兄弟，今我知，恁及恁的領導者按呢做是因為毋知。

¹⁸ 上帝有通過眾先知的嘴預言伊的基督著受苦，此個代誌果然應驗啦。

¹⁹ 所以，著悔改歸向上帝，通互恁的罪得著擦消。

²⁰ 按呢，主就會賜恁更新的日子，閣差遣早就揀好勢的基督耶穌來。

²¹ 照上帝通過古早聖先知的嘴所宣布的，伊一定著𫢶佇天頂直到萬物復興的時。

²² 摩西曾講：『主 — 恁的上帝欲對恁同胞的中間給恁任命一位親像我此款的先知。伊給恁講的話，恁攏著聽趁。

²³ 毋聽此位先知的話的人，會對子民中攏給𪜶除滅。』

²⁴ 對撒母耳到以後所有傳信息的先知攏有講起諸個日子。

²⁵ 恁是先知的子孫，嘛是上帝及恁的祖先所立的約的繼承人。伊曾對亞伯拉罕講：『地上萬族攏會因為你的後代得著福氣。』

²⁶ 上帝任命伊的僕人，先差伊來恁遮，給恁賜福，互恁逐個人越倒轉離開邪惡。」