使徒行傳 28 - 現代台語譯本漢字版

佇馬爾他島

¹ 阮安全上陸了後才知彼個島嶼叫做馬爾他。

² 當地的原住民對阮非常親切，因為落雨閣寒，就起火給阮接待。

³ 保羅拾一捆柴，㧒落火，彼陣有一尾毒蛇因為火燒趖出來，纏佇伊的手。

⁴ 當地的原住民看著彼尾蛇吊佇保羅的手裡，就講來講去：「此個人一定是殺人犯，雖然對海裡拾著命，天理無容允伊活。」

⁵ 保羅將彼尾蛇灑落火裡，攏無受傷。

⁶ 許個人攏金金啲看伊的手會腫起來，抑是伊會忽然慄落去，死去抑𣍐。𪜶聽候真久，看伊攏無代誌，就顛倒想講伊是神明。

⁷ 海嶼的頭目部百流有一塊地離彼所在無偌遠。伊歡迎阮佇遐住三日，真親切接待阮。

⁸ 當時，部百流的老父患著熱病及赤痢，倒佇眠床。保羅入去，給伊按手祈禱，給伊醫好。

⁹ 因為此個代誌，當地其他的病人嘛來，嘛攏得著醫好。

¹⁰ 𪜶送阮真多禮物；阮欲開船的時，將阮需要的物件送到船頂互阮。

對馬爾他島到羅馬

¹¹ 三月日後，阮坐對亞歷山大來，名叫做「雙生仔神」的船出發。此隻船抵佇此個島嶼過冬天。

¹² 阮佇敘拉古上岸，佇遐停留三日，

¹³ 後來對遐開船到利基翁，隔日有透南風，第二日就到部丟利。

¹⁴ 阮佇遐抵著一寡兄弟姊妹，𪜶請阮及𪜶住一禮拜。後來阮來到羅馬。

¹⁵ 羅馬的兄弟姊妹聽著消息，就來亞比烏市及三館迎接。保羅見著𪜶就感謝上帝，閣較有勇氣。

保羅佇羅馬

¹⁶ 阮到羅馬了後，保羅得著允准及顧守伊的兵另外住。

¹⁷ 三日後，保羅請當地猶太人的領袖來。𪜶聚集的時，伊對𪜶講：「各位兄弟，我雖然無做違背同胞的代誌抑是祖先的規例，毋拘佇耶路撒冷受掠，送交互羅馬當局。

¹⁸ 𪜶審問我，看我無犯著該死的罪，有想欲放我；

¹⁹ 不過猶太人反對，我才姑不將對皇帝上訴；其實我無意思欲控告家己的同胞。

²⁰ 因為按呢，我才要求及恁見面，及恁談論。我是為著以色列人所向望彼位才受鐵鍊鍊啲。」

²¹ 𪜶對伊講：「關係你的代誌，阮並無對猶太接著批信，嘛無兄弟來對阮報告，抑是講你的歹話。

²² 不過阮愛聽你的見解，因為阮知恁此派的人佇逐所在互人反對。」

²³ 𪜶及保羅約定一日，到時有真多人來保羅住的所在。對早到暗，保羅為著上帝國做見證，引用摩西的律法及先知的冊勸𪜶信耶穌。

²⁴ 伊所講的話有人信，有人毋信。

²⁵ 𪜶中間的意見無一致；𪜶離開以前，保羅講此句話：「聖神託先知以賽亞對恁的祖先講了真著！

²⁶ 伊講： 你去給此個子民講： 恁聽閣聽嘛𣍐了解； 恁看閣看嘛𣍐看見。

²⁷ 因為此個子民的心已經鈍， 耳孔重， 目睭瞌。 若毋是按呢，𪜶的目睭會看見， 耳孔會聽見， 心會明白，會回心轉意， 我就給𪜶醫好。

²⁸ 「所以，恁著知，上帝此個拯救的信息已經傳互外邦人。𪜶會聽趁！」

³⁰ 保羅住佇家己租的厝足足兩年久。來訪問的人，伊攏給𪜶接待。

³¹ 伊好膽宣揚上帝國的信息，閣教示關係主耶穌基督的事，攏無受阻擋。