使徒行傳 27 - 現代台語譯本漢字版

保羅坐船去羅馬

¹ 非斯都已經決定阮著坐船去意大利，𪜶就將保羅及其他的犯人交互皇家禁衛軍一個名叫猶流的軍官。

² 阮坐一隻對亞大米田來的船；此隻船抵仔欲沿亞細亞省幾若個港口開船。有一個對帖撒羅尼迦來的馬其頓人亞里達古及阮做夥去。

³ 隔日阮到西頓。猶流真親切對待保羅，准伊去見伊的朋友，受𪜶招待。

⁴ 阮對遐閣開船，因為逆風，就順塞浦路斯島倚閃風彼旁行。

⁵ 阮經過基利家及旁非利亞的外海，來到呂家的每拉。

⁶ 佇遐，軍官猶流尋著一隻對亞歷山大來的船欲開去意大利，就叫阮上彼隻船。

⁷ 連續幾若日，船行真慢，勉強才來到革尼土的外海。因為受著風的阻擋，阮就順克里特島南旁倚閃風彼旁岸行對撒摩尼角過去。

⁸ 阮的船順海墘行，勉強來到離拉西亞無偌遠一個叫做安全港的所在。

⁹ 阮已經延真多日，閣因為禁食的節期嘛過了，行船危險，所以保羅勸大家，

¹⁰ 講：「各位先生，我看咱繼續行船，毋若貨物及船，連咱的性命都會抵著危險閣大損失。」

¹¹ 毋拘軍官寧可相信船長及船主，毋聽保羅講的話。

¹² 閣此個港口嘛無適合過冬天，大部分的人贊成開船，向望會當趕去菲尼基過冬天。菲尼基是克里特島的一個港口，一面向西南，一面向西北。

抵著大風

¹³ 彼時，南風微微仔吹來，大家想講會順利到目的地就起碇，倚克里特島的海墘行。

¹⁴ 無久有一陣叫做友拉革羅的東北大風對克里特島掃落來。

¹⁵ 船互風掃，駛𣍐行，就出在伊飄流。

¹⁶ 阮來到一個小島叫做高大的南旁，閃風的彼旁岸，勉強將救生艇縛好勢。

¹⁷ 然後水手將救生艇拖起來船頂，用大索給伊捆啲。𪜶驚了船佇賽耳底的沙洲擱淺，就落帆，出在伊飄流。

¹⁸ 暴風繼續吹，隔日𪜶開始將貨物擲落海。

¹⁹ 第三日，𪜶閣親手將船頂的器具擲掉。

²⁰ 真多日，日頭看𣍐著，星嘛看𣍐著；風湧繼續拍甲真厲害，最後阮完全放棄得救的向望。

²¹ 眾人真久攏無食，保羅徛佇𪜶中央，講：「各位先生，恁早若聽我的話，無對克里特開船，就𣍐抵著此款的危險及損失。

²² 現在我勸恁著勇敢；恁中間無甲一個人會喪失性命；干焦會失落此隻船若定。

²³ 因為我所屬所敬拜的上帝，昨暗有差伊的天使來對我

²⁴ 講：『保羅，免驚！你一定著徛佇皇帝面前。上帝已經將船內攏總的人交託你啦。』

²⁵ 所以，著勇敢，因為我相信代誌一定會照上帝給我講按呢實現。

²⁶ 不過咱一定會佇一個島嶼擱淺。」

²⁷ 到第十四日的暗時，阮猶佇亞得里亞海啲飄流。到半暝，水手想講阮啲欲倚近陸地，

²⁸ 就擲測量索落去探，探出有四十公尺深；較進前，閣探一遍，探出有三十公尺深。

²⁹ 𪜶驚了船犁著暗礁，就對船尾拋四個碇，迫切聽候天緊光。

³⁰ 水手想欲放拺船逃走，將救生艇縋落去海裡，假做欲對船頭拋碇。

³¹ 保羅對軍官及兵丁講：「諸個人若無留佇船頂，恁就無救。」

³² 兵丁就斬斷救生艇的索，互伊流去。

³³ 天欲光的時，保羅勸眾人著食。伊講：「恁已經聽候十四日久攏無食，

³⁴ 所以我勸恁著食一寡物件才會當活落去。恁連一支頭毛都𣍐失落。」

³⁵ 保羅講了後，提餅，佇眾人的面前感謝上帝，擘開，食。

³⁶ 眾人心就定落來，提物件食。

³⁷ 及阮同船的人攏總有兩百七十六個。

³⁸ 大家食飽了後，將麥仔擲落海，互船較輕。

船擱淺

³⁹ 天光的時，水手毋識彼個所在，不過𪜶看著有一個海灣有沙灘，就想看會當將船駛上灘抑𣍐。

⁴⁰ 𪜶給索斬斷，將碇㧒落海，閣解開船舵的索，給船頭的帆吊起來，互伊食風，互船駛上灘。

⁴¹ 毋拘船犁著沙坪煞擱淺；船頭咬牢啲𣍐振動，船尾互大湧拍破。

⁴² 兵丁驚了犯人泅水逃走，想欲給𪜶攏刣死。

⁴³ 毋拘軍官愛欲救保羅，就給𪜶阻止。伊命令會曉泅的人先跳落水，泅上岸；

⁴⁴ 其他的人才利用船枋抑是船的破片上陸。最後，眾人攏安全上岸。