使徒行傳 26 - 現代台語譯本漢字版

保羅為家己辯護

¹ 亞基帕對保羅講：「准你為著家己辯護。」保羅就伸手開始辯護：

² 「亞基帕王，今仔日會當佇你的面前為著猶太人控告我一切的事申辯，我感覺萬幸。

³ 因為你對猶太人的慣例及爭論的問題特別精通，所以我懇求你耐心聽。

⁴ 「我對少年到今，起頭佇我本國，後來佇耶路撒冷，作人按怎，所有的猶太人攏知。

⁵ 𪜶已經識我真久，若肯，會當為著我作證。我作一個法利賽人，有照阮的宗教上嚴格教派的要求啲生活。

⁶ 現在我徛佇遮受審判，是因為我向望上帝對阮祖先的應允會實現；

⁷ 阮十二支族的同胞暝日熱心敬拜嘛是為著欲互此個向望實現。王啊，為著此個向望，我才受猶太人控告。

⁸ 上帝互死人閣活此項代誌，恁是按怎斷定𣍐當相信？

⁹ 「以前我本身嘛想講著用逐款的方法來反對拿撒勒人耶穌的名。

¹⁰ 我佇耶路撒冷確實有按呢做，毋若有對祭司長領受權柄掠真多信徒關監，閣佇𪜶受處死的時嘛表示贊成。

¹¹ 我時常佇各地的會堂給𪜶刑罰，強迫𪜶褻瀆此個信仰，閣用暴力對待𪜶，甚至去到外國的城市給𪜶迫害。」

保羅悔改的經過

¹² 「有一遍，我帶祭司長的權柄及命令去大馬士革。

¹³ 王啊，佇半路，中晝的時，我看著比日頭閣較強的光對天頂照落來，給我及同行的人罩啲。

¹⁴ 阮攏跋落去土腳。我有聽著一個聲，用希伯來話對我講：『掃羅，掃羅，你是按怎啲迫害我？你按呢做，親像用拳頭母啲掙石獅，家己討皮疼。』

¹⁵ 我問講：『主啊，你是什麼人？』主講：『我就是你啲迫害的耶穌。

¹⁶ 起來，徛啲；我對你顯現是欲派你做我的僕人為著所看見關係我的事，以及將來欲對你顯現的事作證。

¹⁷ 我欲對以色列人及外邦人的中間給你救出來，差遣你去𪜶遐，

¹⁸ 開𪜶的目睭，互𪜶離開烏暗進入光明，離開撒旦的權勢歸向上帝，互𪜶對信我得著赦罪，閣承受作上帝選民的地位。』」

保羅說明伊的工作

¹⁹ 「所以，亞基帕王，我無違背對天來的異象。

²⁰ 我代先對大馬士革及耶路撒冷的人，後來對猶太全地的人，嘛對外邦人傳道，勸𪜶著悔改來歸向上帝，閣著用行為證明𪜶有真正悔改。

²¹ 為著此個緣故，猶太人佇聖殿內掠我，想欲刣我。

²² 到今仔日，我得著上帝的幫贊，會當徛佇遮對尊貴及卑微的人做見證。我所講的，及先知以及摩西所講的仝款，是關係將來欲發生的事，

²³ 就是基督一定著受苦，成做頭一個對死人中閣活的，通將拯救的光傳互猶太人及外邦人。」

²⁴ 保羅按呢為著家己啲辯護的時，非斯都對伊大聲喝：「保羅，你起狂啦；你的博學互你起狂啦！」

²⁵ 保羅講：「非斯都閣下！我並無起狂；我所講的話真實閣合理。

²⁶ 因為王知諸個代誌，我才敢大膽對王講。我相信王對諸個代誌攏真清楚，因為所發生諸個代誌無人毋知。

²⁷ 亞基帕王，你有相信先知無？我知你有。」

²⁸ 亞基帕對保羅講：「你講幾句仔話就欲說服我做基督徒噢！」

²⁹ 保羅應講：「無論幾句仔話抑是真多話，我祈求上帝，毋若是你，連今仔日佇遮所有聽我講話的人嘛攏會及我仝款，毋拘無親像我互人用鐵鍊鍊啲。」

³⁰ 王、總督、百妮基，及同坐的人攏徛起來。

³¹ 𪜶退出了後互相談論講：「此個人並無犯著什麼該死抑是著關監的罪。」

³² 亞基帕對非斯都講：「此個人若無對皇帝上訴，早就通給伊放啦。」