使徒行傳 25 - 現代台語譯本漢字版

保羅向羅馬皇帝上訴

¹ 非斯都就任三日後，對凱撒利亞上去耶路撒冷。

² 祭司長及猶太人的領袖對伊控告保羅。𪜶請求非斯都，

³ 拜託伊將保羅送去耶路撒冷。𪜶計謀佇路中埋伏欲給伊刣死。

⁴ 非斯都應講：「保羅關佇凱撒利亞，我家己嘛連鞭欲轉去遐。

⁵ 所以恁中間做頭的人通及我做夥去凱撒利亞，此個人若有做什麼毋著，𪜶通佇遐給伊告。」

⁶ 非斯都住遐成十日，就倒去凱撒利亞。隔日，伊開庭，命令人帶保羅來。

⁷ 保羅一下出庭，對耶路撒冷落來許個猶太人倚來徛佇伊的周圍，用真多嚴重的罪名給伊控告，毋拘提𣍐出證據。

⁸ 保羅為著家己辯護，講：「我對猶太人的律法，抑是聖殿，抑是羅馬皇帝攏毋曾做什麼毋著的代誌。」

⁹ 毋拘非斯都為著欲互猶太人歡喜，就問保羅：「你願意上耶路撒冷，佇遐為著諸個告訴接受我的審判無？」

¹⁰ 保羅講：「我現在徛佇皇帝的法庭，當然著佇遮受審判。你明明知，我並無得罪猶太人。

¹¹ 我若有做毋著，犯著該死的罪，就是著死，我嘛絕對𣍐逃避。毋拘𪜶的控告若無事實，無人會當給我交互𪜶。我欲對皇帝上訴。」

¹² 非斯都及顧問參詳了後，應講：「既然你已經對皇帝上訴，就去皇帝遐。」

非斯都對亞基帕王報告保羅的代誌

¹³ 過幾若日，亞基帕王及百妮基來凱撒利亞，對非斯都表示敬意。

¹⁴ 𪜶佇遐住幾若日了後，非斯都將保羅的案件講互亞基帕王聽。伊講：「佇遮有一個腓力斯留落來的犯人。

¹⁵ 我去耶路撒冷的時，猶太人的祭司長及長老有給伊告，要求我給伊定罪。

¹⁶ 我給𪜶講，照羅馬人的慣例，被告猶未及原告面對面對指，猶無機會為家己辯護，𣍐當給伊定罪。

¹⁷ 所以，𪜶攏到位，我隨時佇隔日開庭，命令帶彼個人來。

¹⁸ 原告徛起來控告，毋拘所告的無一項是我所想的赫呢歹。

¹⁹ 𪜶及伊爭論的是𪜶家己的宗教問題，以及一個叫做耶穌的人的代誌。伊已經死，毋拘保羅主張伊猶啲活。

²⁰ 諸個問題我毋知著按怎調查，所以問保羅看願意上耶路撒冷佇遐為著諸個代誌受審判抑無。

²¹ 毋拘保羅請求繼續給伊扣留，聽候皇帝裁決，所以我命令給伊扣留到送交互皇帝。」

²² 亞基帕給非斯都講：「我家己嘛愛聽此個人講話。」 非斯都講：「明仔載你會當聽伊講。」

²³ 隔日，亞基帕及百妮基非常奢颺入場，導指揮官及市內的要人進入大廳。非斯都下令，保羅就互人導入來。

²⁴ 非斯都講：「亞基帕王及在座各位！恁看此個人！佇遮及佇耶路撒冷所有的猶太人攏對我請求，喝講著互伊死。

²⁵ 毋拘我查𣍐出伊有犯著什麼該死的罪。伊既然家己對皇帝上訴，我就決定給伊送去。

²⁶ 關係此個人，我無確實的資料通對皇上呈奏。因為按呢我才給伊導來各位面前，特別佇亞基帕王你的面前，查明案情了後通得著資料呈奏。

²⁷ 因為照我看，押送囚犯，無指明伊的罪名是無合理。」