使徒行傳 21 - 現代台語譯本漢字版

保羅上耶路撒冷

¹ 離別眾人了後，阮開船一直到哥士，隔日到羅底，對遐去帕大喇，

² 佇遐抵著一隻欲過去腓尼基的船，阮就上船出發。

³ 阮來到看會著塞浦路斯的時，對南旁踅過，去敘利亞，佇泰爾落船，因為船欲佇遐落貨。

⁴ 阮尋著一寡門徒，佇遐及𪜶住七日。𪜶得著聖神的指示，勸保羅毋通上耶路撒冷。

⁵ 阮及𪜶離別的時間到就離開，繼續阮的路程。𪜶攏導𪜶的某子送阮到城外，佇海邊跪落去祈禱，

⁶ 互相相辭了後阮上船，𪜶倒去𪜶兜。

⁷ 阮繼續航程對泰爾去到多利買，佇遐給信徒請安，及𪜶住一日。

⁸ 隔日，阮出發去凱撒利亞，佇遐住佇傳福音的腓力的厝，伊是耶路撒冷彼七個執事的一個。

⁹ 伊有四個猶未結婚的查某子，攏做先知會講預言。

¹⁰ 阮住佇遐幾若日的中間，有一個先知叫做亞迦布對猶太落來。

¹¹ 伊來尋阮，提保羅的腰帶縛家己的腳及手，講：「聖神按呢講：『此條腰帶的主人會佇耶路撒冷親像按呢互猶太人縛起來，然後交互外邦人。』」

¹² 阮一下聽著，就及彼所在的人苦勸保羅毋通上耶路撒冷。

¹³ 保羅應講：「恁哪哭甲按呢，互我的心強欲碎去？我為著主耶穌的名，毋若佇耶路撒冷互人縛，甚至佇遐死嘛甘願。」

¹⁴ 伊毋受苦勸，阮就恬恬，只有講：「願主的旨意實現！」

¹⁵ 幾若日後，阮準備好勢，就上耶路撒冷。

¹⁶ 有一寡對凱撒利亞來的門徒嘛及阮去，導阮去塞浦路斯人拿孫的厝住；伊是早期的門徒。

保羅訪問雅各

¹⁷ 阮到耶路撒冷的時，信徒熱誠接待阮。

¹⁸ 隔日，保羅及阮去訪問雅各；教會的眾長老攏佇遐。

¹⁹ 保羅給𪜶請安，然後將上帝通過伊佇外邦人的中間所做的工作一項一項對𪜶報告。

²⁰ 𪜶聽了攏歸榮光互上帝，對保羅講：「兄弟，你知，佇遮有幾若萬猶太人成做信徒，𪜶攏熱心遵守律法。

²¹ 𪜶有聽著你教示住佇外邦的猶太人，叫𪜶放棄摩西的律法，毋免給𪜶的囝仔行割禮，嘛毋免守猶太人的風俗習慣。

²² 𪜶一定會聽著你來遮的消息，按呢欲按怎？

²³ 今著照阮給你講的去做。遮有四個下願的查甫人；

²⁴ 你導𪜶做夥去參加潔淨禮，替𪜶納所費，互𪜶通剃頭。你按呢做，眾人就知，𪜶所聽著關係你的事毋是事實，閣知你家己嘛有啲遵守摩西的律法。

²⁵ 不過對已經做信徒的外邦人，阮已經有寫批給𪜶講，阮有裁決叫𪜶毋通食祭偶像的物、血，及捏死的牲生，嘛毋通有淫亂。」

²⁶ 隔日，保羅導彼四個查甫人及𪜶做夥去參加潔淨禮，然後入去聖殿報告潔淨禮什麼時滿，通為著𪜶逐個人獻祭物。

保羅佇聖殿受掠

²⁷ 七日的期啲欲滿的時，一寡對亞細亞來的猶太人有看著保羅佇聖殿內，就煽動群眾掠保羅，

²⁸ 喝講：「以色列人，來鬥相共一下！此個人逐所在教人反對以色列人及摩西的律法，嘛反對此個聖殿。現在伊閣敢導希臘人進入聖殿，污染此個神聖的所在。」

²⁹ 因為𪜶有看著以弗所人特羅非摩及保羅做夥佇城內，想講保羅有導伊入去聖殿。

³⁰ 全城擾亂起來，民眾攏走倚來；𪜶掠保羅，給伊拖出去聖殿的外面，殿的門隨時關起來。

³¹ 𪜶抵想欲刣保羅的時，有消息傳到羅馬軍營的指揮官遐，講全耶路撒冷啲起擾亂。

³² 指揮官隨時帶兵及軍官走到民眾遐。民眾一下看著指揮官及兵就停手，無閣拍保羅。

³³ 指揮官倚去掠保羅，叫人用兩條鐵鍊給伊鍊啲，閣問伊是啥人，有做什麼代誌。

³⁴ 群眾一個喝一款，因為亂操操，指揮官無法度通知實情，就命令兵押保羅入去營房。

³⁵ 保羅啲欲𬦰砛仔的時，因為群眾雄介介，兵煞著給保羅扛入去。

³⁶ 群眾隨佇後面喝講：「互伊死！」

保羅為家己辯護

³⁷ 保羅抵欲互人押入去營房的時對指揮官講：「我會當給你講一句話𣍐？」指揮官問講：「你識希臘語噢！

³⁸ 按呢你就毋是彼個無久以前造反，導四千個殺手走去曠野的埃及人囉。」

³⁹ 保羅應講：「我是猶太人，出世佇基利家的大數，是一個不止有名的城市的市民。請你准我對民眾講話。」

⁴⁰ 指揮官允准，保羅就徛佇砛仔頂對民眾比手勢。眾人攏恬落去，保羅就用希伯來話對𪜶講話。