使徒行傳 20 - 現代台語譯本漢字版

保羅訪問馬其頓及希臘

¹ 擾亂平靜了後，保羅召集門徒，給𪜶勉勵，及𪜶相辭，就離開遐去馬其頓。

² 伊經過許個地區，講真多話勉勵信徒，然後去希臘，

³ 佇遐住三個月。伊準備欲坐船去敘利亞的時，猶太人計謀欲害伊，就決定經過馬其頓轉去。

⁴ 及伊做夥去的，有庇哩亞人畢羅斯的子所巴特，閣有帖撒羅尼迦人亞里達古及西公都，特庇人該猶，閣有提摩太及亞細亞人推基古及特羅非摩。

⁵ 諸個人先出發，佇特羅亞啲聽候阮。

⁶ 除酵節過了，阮對腓立比開船，五日後到特羅亞及𪜶會合，佇遐住七日。

保羅最後一遍訪問特羅亞

⁷ 拜六暗，阮大家聚會擘餅的時，保羅及大家談論，因為隔日就欲離開，所以講到半暝。

⁸ 阮啲聚會彼間樓頂的房間有點真多燈火。

⁹ 有一個少年人，叫做猶推古，坐佇窗仔門，保羅繼續講真久，伊煞睏重眠，對三樓跋落去，大家給伊扶起來的時已經死。

¹⁰ 保羅落去，仆佇伊的身軀，給伊攬啲，講：「毋免著急，伊猶有氣。」

¹¹ 然後伊閣𬦰去樓頂，擘餅，食，繼續及𪜶談論真久，到天光才離開。

¹² 𪜶給彼個活起來的少年人導轉去，大家受真大的安慰。

對特羅亞去米利都

¹³ 阮先上船，開去亞朔，通佇遐接保羅上船；因為伊欲行陸路去遐，所以有按呢安排。

¹⁴ 伊佇亞朔及阮會合，阮就接伊上船去米推利尼。

¹⁵ 阮對遐開船，隔日到基阿的對面岸，一日後佇撒摩靠岸，閣隔日到米利都。

¹⁶ 保羅已經決定無愛佇以弗所停留，才免佇亞細亞延時間。伊欲趕緊去耶路撒冷，看會當佇五旬節以前到位𣍐。

保羅勸勉以弗所的長老

¹⁷ 保羅對米利都差人去以弗所，召集教會的長老來。

¹⁸ 𪜶到位的時，保羅對𪜶講：「對我來到亞細亞彼日起一直到現在，我及恁按怎做夥生活，恁攏知。

¹⁹ 雖然我有對猶太人的計謀受著試煉，猶久非常謙卑閣流目屎啲服事主。

²⁰ 無論佇公共的場合抑是個別的家庭，若對恁有利益的，我毋曾無對恁傳，無給恁教；

²¹ 對猶太人及希臘人，我攏嚴嚴勸告𪜶著悔改歸向上帝，閣信咱的主耶穌。

²² 現在，我順服聖神欲去耶路撒冷，佇遐會抵著什麼代誌，我毋知，

²³ 不過我知，聖神給我警告，講佇逐個城市有監獄及患難啲聽候我。

²⁴ 毋拘為著欲行完我的路程，完成主耶穌交代我的任務，通見證上帝恩典的福音，我完全無惜家己的性命。

²⁵ 「我一直佇恁中間出入啲宣揚上帝國，現在我知，以後恁𣍐當閣見著我。

²⁶ 所以，今仔日我給恁講清楚，恁中間若有人沉淪，毋是我的責任，

²⁷ 因為我已經將上帝的旨意攏總傳互恁啦。

²⁸ 恁家己著謹慎，嘛著照顧聖神交託互恁攏總的羊群，作監督來牧養上帝的教會，就是伊用家己的子的死來贖回的。

²⁹ 我知我離開了後有兇惡的豺狼會入來恁中間傷害羊群。

³⁰ 甚至佇恁中間有人會出來曲解真理，引誘門徒去隨𪜶。

³¹ 所以，恁著警醒，會記得我三年久暝日流目屎勸戒恁逐個人。

³² 「現在我將恁交託互上帝，通對伊恩典的信息得著造就，互恁及聖化歸主的人攏通繼承伊所賜的福分。

³³ 我毋曾貪人的金、銀，抑是衣服。

³⁴ 恁家己知，我用此兩支手做工來供給家己及同伴的需要。

³⁵ 逐項事我攏有做互恁看，愛恁一定著拍拼做工來幫贊軟弱的人。著會記得主耶穌家己所講的話：『互人的比領受的較有福氣。』」

³⁶ 諸個話講煞，保羅及𪜶大家攏跪落去祈禱。

³⁷ 大家大聲哮，給伊攬，給伊唚；

³⁸ 因為保羅講「以後𣍐當閣相見」此句話互𪜶非常傷心。然後𪜶送伊上船。