使徒行傳 16 - 現代台語譯本漢字版

提摩太隨保羅及西拉去傳道

¹ 保羅閣去特庇及路司得，佇遐有一個門徒叫做提摩太，老母是猶太人，是信徒，老父是希臘人。

² 路司得及以哥念的信徒攏稱讚伊。

³ 保羅想欲導伊做夥去，就給伊行割禮，因為彼所在的猶太人攏知伊的老父是希臘人。

⁴ 𪜶一個城過一個城將耶路撒冷的使徒及長老所議決的規例交互𪜶去遵守。

⁵ 對按呢，逐教會的信心愈堅固，人數日日加添。

馬其頓的呼聲

⁶ 因為聖神阻止保羅及西拉佇亞細亞省傳道，𪜶就對弗呂家及加拉太的地方經過。

⁷ 𪜶來到每西亞邊界的時，想欲入去庇推尼省，不過耶穌的神毋准，

⁸ 𪜶就踅過每西亞，落去特羅亞。

⁹ 彼暗，保羅看見異象，有一個馬其頓人徛啲，給伊懇求講：「請過來馬其頓幫贊阮！」

¹⁰ 保羅看見此個異象了後，阮隨時準備欲去遐，因為確信上帝有呼召阮去傳福音互馬其頓人。

呂底亞歸主

¹¹ 阮對特羅亞開船，直直開去撒摩特喇，隔日到尼亞坡里。

¹² 阮對遐來到馬其頓第一區的城腓立比；此個城是羅馬的殖民區。阮佇遐住幾若日。

¹³ 佇安歇日，阮出城去河邊，想講佇遐有祈禱的所在。阮坐落去，就對聚集佇遐的婦女講道理。

¹⁴ 有一個賣紫色布的推雅推喇的婦女，名叫做呂底亞，是敬畏上帝的人，伊嘛來聽。主開伊的心，互伊專心聽保羅所講的話。

¹⁵ 伊及全家攏受洗禮，後來伊懇求阮講：「恁若看我有真實信主，請來住阮兜。」伊按呢給阮強留啲，阮就留落來。

保羅及西拉佇腓立比坐監

¹⁶ 有一日，阮欲去祈禱的所在，有抵著一個互卜卦的神附身的查某奴隸，伊靠卜卦互主人賺真多錢。

¹⁷ 伊隨佇保羅及阮後面，大聲喝：「諸個人是至高上帝的僕人，欲對恁宣布得救的道路。」

¹⁸ 伊真多日攏按呢喝；保羅感覺真討厭，就越過去給彼個邪神講：「我奉耶穌基督的名命令你對伊出去！」邪神隨時對伊出去。

¹⁹ 查某奴隸的主人看著𪜶賺錢的向望攏無去，就給保羅及西拉扭啲，拖𪜶去市中心見官員，

²⁰ 交互羅馬官長，控告𪜶，講：「諸個人來啲擾亂咱的城；𪜶是猶太人，

²¹ 啲傳咱羅馬人毋應該接受抑是遵守的風俗習慣。」

²² 群眾摻啲攻擊，官長就剝保羅及西拉的衫，命令人用棍仔給𪜶摃。

²³ 兵丁給𪜶摃真多下了後，給𪜶關落監，閣命令顧監的人嚴密看守。

²⁴ 顧監的人接著命令，就給𪜶關落內監，雙腳銬佇柴楗。

²⁵ 差不多半暝，保羅及西拉啲祈禱，吟詩謳咾上帝，其他的犯人攏注意啲聽。

²⁶ 忽然有大地動，致到監獄的地基搖泏；所有的監門隨時開，犯人的鎖鍊攏落去。

²⁷ 顧監的人醒起來，看著監門開開，想講犯人攏逃走，就拔刀欲自殺。

²⁸ 保羅大聲喝：「毋通傷害家己，阮攏佇遮。」

²⁹ 顧監的人叫人攑燈來，闖入去，皮皮惙仆佇保羅及西拉的腳前，

³⁰ 然後導𪜶出去，問講：「先生，我著做什麼才會得著救？」

³¹ 𪜶講：「著信主耶穌，你及你的家就會得著救。」

³² 𪜶就將主的道理講互伊及𪜶全家的人聽。

³³ 彼暝，顧監的人導保羅及西拉去洗孔嘴，然後伊及全家的人攏隨時受洗禮。

³⁴ 伊導𪜶入去伊的厝，準備物件互𪜶食。伊及全家攏大歡喜，因為𪜶已經信上帝。

³⁵ 隔早起，羅馬的官長派警官來，講：「給彼兩個人放出去。」

³⁶ 顧監的人將諸個話給保羅講：「官長有交代欲放恁出去；今恁出來，平安離開。」

³⁷ 毋拘保羅對警官講：「阮是羅馬公民，無受審問就佇眾人的面前用棍仔給阮摃，閣給阮關落監，此陣𪜶欲恬恬仔給阮趕出去是無？𣍐用得！叫羅馬官長親身來導阮出去！」

³⁸ 警官將諸個話對羅馬的官長報告。𪜶一下聽著保羅及西拉是羅馬公民就真驚惶，

³⁹ 來監裡勸𪜶，導𪜶出來，請𪜶離開彼個城。

⁴⁰ 保羅及西拉離開監獄，就去呂底亞𪜶兜，及信徒見面，給𪜶鼓勵了後才離開。