使徒行傳 11 - 現代台語譯本漢字版

彼得對耶路撒冷的教會報告

¹ 使徒及住佇猶太的信徒攏有聽著外邦人嘛接受上帝的道。

² 彼得上耶路撒冷的時，許個受割禮的猶太人信徒給伊批評，講：

³ 「你竟然入去無受割禮的人的厝及𪜶做夥食飯！」

⁴ 彼得就將所發生的代誌對頭一項一項給𪜶說明：

⁵ 「我佇約帕城啲祈禱的時有入神看見異象，有一個物件親像一塊大塊布，四角頭吊啲，對天頂縋落來到我面前。

⁶ 我詳細看，內面有地上的牲生、野獸、蟲𧒴，及空中的鳥類。

⁷ 我閣聽著有聲給我講：『彼得，起來，刣來食！』

⁸ 我講：『主啊，絕對𣍐用得！我毋曾食污穢無清氣的物。』

⁹ 彼個聲第二遍對天頂應我講：『上帝互伊清氣的，你毋通看做污穢。』

¹⁰ 此個代誌繼續有三遍，許個物件就攏閣收倒轉去天頂。

¹¹ 抵彼時，對凱撒利亞派來尋我彼三個人來到阮啲住彼間厝。

¹² 聖神叫我著及𪜶去，毋通躊躇。彼六個信徒嘛及我做夥去凱撒利亞。阮就攏入去哥尼流的厝。

¹³ 哥尼流給阮講伊有看見一個天使徛佇伊的厝內，對伊講：『著差人去約帕請彼個叫做彼得的西門來。

¹⁴ 伊有話欲給你講，通互你及你的全家攏得著救。』

¹⁵ 我開始講話的時，聖神降臨佇𪜶身上，及當初降臨佇咱身上仝款。

¹⁶ 我就想起主所講的話：約翰用水給恁洗禮，毋拘恁會領受聖神的洗禮。

¹⁷ 既然上帝有將咱信主耶穌基督的時所領受像款的恩賜賜互外邦人，我算啥人，哪會當阻擋上帝的所做？」

¹⁸ 𪜶聽著諸個話就恬去，歸榮光互上帝，講：「上帝嘛有互外邦人悔改來得著活命。」

安提阿的教會

¹⁹ 因為司提反的代誌受迫害四散的信徒，有的到腓尼基、塞浦路斯，及安提阿，𪜶無對別人，只有對猶太人傳道。

²⁰ 毋拘其中有一寡塞浦路斯及古利奈的信徒到安提阿，嘛向希臘人傳，對𪜶講起主耶穌的福音。

²¹ 主的氣力及𪜶同在，信來歸主的人額真多。

²² 此個消息傳到耶路撒冷的教會，𪜶就派巴拿巴去安提阿。

²³ 伊一下到位，看著上帝有賜𪜶恩惠，就歡喜，勸勉𪜶大家著全心一意信靠主。

²⁴ 巴拿巴是好人，互聖神充滿，閣有信心。彼時有真多人信主。

²⁵ 後來，巴拿巴去大數尋掃羅，

²⁶ 尋著就導伊去安提阿。足足一年久，𪜶兩個及教會的人聚會，教示真多人。門徒叫做「基督徒」是對安提阿開始。

²⁷ 彼時，有幾若個先知對耶路撒冷落去安提阿。

²⁸ 其中一個名叫做亞迦布；伊得著聖神的指示，徛起來預言講全世界啲欲有大飢荒。此個代誌佇克勞第統治的年間果然發生。

²⁹ 門徒就決定逐個人照家己的能力捐獻，通送去賑濟住佇猶太的信徒。

³⁰ 𪜶就照按呢做，將捐獻託巴拿巴及掃羅交互遐的長老。