使徒行傳 1 - 現代台語譯本漢字版

耶穌應允賜聖神

^1-2 提阿非羅先生： 佇我所寫的頭一本冊，我已經有將耶穌所做所教示一切的代誌，對伊開始工作直到上天彼日，攏有講起。伊上天以前，有通過聖神將真多代誌指示所揀選的使徒。

³ 伊受害以後，有用真多證據顯明伊本身活啲，佇四十日的中間有顯現互使徒看見，對𪜶講論上帝國的事。

⁴ 耶穌及𪜶做夥的時有吩咐𪜶：「毋通離開耶路撒冷，照我曾給恁講，著聽候父的應允。

⁵ 約翰用水給恁洗禮，毋拘閣無幾日，恁會領受聖神的洗禮。」

耶穌上天

⁶ 使徒及耶穌聚集的時，問伊講：「主啊，你欲佇此個時將主權回復互以色列是無？」

⁷ 伊給𪜶講：「父用家己的權柄決定的時間及機會，毋是恁通知的。

⁸ 毋拘聖神臨到恁的時，恁會得著能力，佇耶路撒冷、全猶太及撒馬利亞，直到天邊海角為著我做見證。」

⁹ 耶穌講諸個話了後，佇𪜶啲看的時受接上天；有一片雲給伊接去，𪜶就看𣍐著。

¹⁰ 𪜶猶啲注目看天的時，忽然有兩個穿白衫的人徛佇𪜶身邊，

¹¹ 講：「加利利人啊，恁哪徛佇遮啲看天？此位離開恁受接上天的耶穌，恁看見伊按呢上天，伊嘛會照按呢閣來。」

選馬提亞做使徒

¹² 後來，使徒對彼個叫做橄欖山的所在倒去耶路撒冷；橄欖山離耶路撒冷無偌遠，差不多一公里，就是安歇日會用得行的路程。

¹³ 𪜶入城了後，𬦰起去𪜶所住彼間厝樓頂的廳；彼得、約翰、雅各、安得烈、腓力及多馬、巴多羅買及馬太、亞勒腓的子雅各、激進黨的西門，及雅各的子猶大佇遐。

¹⁴ 𪜶及幾若個婦仁人，嘛有耶穌的老母馬利亞以及伊的兄弟，攏繼續同心合意迫切祈禱。

¹⁵ 幾若日後，差不多有一百二十個信徒聚集。彼得徛起來，講：

¹⁶ 「各位兄弟，聖神通過大闢的嘴佇聖經所預言，關係猶大導人掠耶穌的代誌一定著應驗。

¹⁷ 伊本來是咱中間的一個，受選來分擔此個職份。

¹⁸ 「猶大用伊做不義的代誌所得著的錢買一塊地；伊佇遐倒頭栽摔死，腹肚爆裂，腸仔攏流出來。

¹⁹ 住佇耶路撒冷的人攏知此項代誌，所以照𪜶本地的話給彼塊地叫做亞革大馬，意思是『血園』。

²⁰ 「因為詩篇有記載： 著互伊的厝荒廢， 無人佇遐徛起。 閣有記載： 著互別人代替伊領導的職位。

^21-22 「所以，著有一個人來加入，及阮做夥作主耶穌閣活的見證人。此個人著佇主耶穌及咱做夥出入的時，就是對約翰施洗起，到耶穌離別咱受接上天彼日，不時及咱做陣。」

²³ 𪜶就提名兩個人，就是叫做巴撒巴，嘛稱做猶士都的約瑟，及馬提亞。

²⁴ 𪜶祈禱講：「主啊，你知逐個人的心。求你指示阮，此兩人中間叨一個是你所揀選，

²⁵ 欲來擔當使徒的職份的，因為猶大已經放拺此個職份，去伊應該去的所在。」

²⁶ 然後，𪜶抽籤，抽著馬提亞，伊就加入十一個使徒的團體。