Si-phian 95 - 現代台語譯本漢字版

謳咾的歌

¹ 來啊，咱來唱歌謳咾上主！ 咱來稱讚拯救咱的保護者！

² 咱著用感謝來到伊的面前！ 著對伊唱歡喜的歌！

³ 因為上主是偉大的上帝， 是贏過一切神明的大君王。

⁴ 伊統轄地極深的所在； 極高的山峰嘛佇伊手內。

⁵ 伊創造海洋，大海屬伊； 伊嘛親手創造陸地。

⁶ 來啊，咱來鞠躬敬拜伊！ 咱來跪拜創造咱的上主！

⁷ 因為伊是咱的上帝； 咱是伊牧養的羊群， 是伊照顧的子民。 今仔日，恁應該著聽伊的話。

⁸ 恁毋通硬心，親像佇米利巴的時， 親像佇曠野的瑪撒彼一日。

⁹ 彼時，恁的祖先考驗我； 雖然𪜶有看著我的作為，猶久試探我。

¹⁰ 四十年久，我討厭彼世代的人。 我講：「𪜶是心神無定的子民； 𪜶毋識我的道路。」

¹¹ 所以，我佇受氣中立誓，講： 「𪜶絕對𣍐當進入我的土地安歇。」