Si-phian 94 - 現代台語譯本漢字版

人類的審判者上帝

¹ 上主，你是申冤的上帝； 申冤的上帝啊，求你發出光。

² 審判世界的主啊，求你起來， 互驕傲的人受應該受的報應。

³ 上主啊，歹人欲閣偌久， 歹人洋洋得意欲閣偌久？

⁴ 𪜶的嘴吐出驕傲的話； 做歹的人攏啲展家己。

⁵ 上主啊，𪜶欺壓你的子民， 苦楚你的產業以色列。

⁶ 𪜶害死孤兒寡婦， 閣殺害出外人。

⁷ 𪜶講：「上主一定無啲注意； 雅各的上帝一定無啲看。」

⁸ 恁諸個親像牲生的人著想； 恁諸個愚戇的人底時才會有智慧？

⁹ 造耳孔的上帝家己豈𣍐聽見？ 造目睭的上帝家己豈𣍐看見？

¹⁰ 管教列邦的上帝豈𣍐處罰？ 教導人的上帝豈會無智識？

¹¹ 上主知人的心思， 知𪜶所想的攏無路用。

¹² 上主啊，受你管教的人真有福氣！ 你用律法給伊教導，

¹³ 欲互伊佇患難的日安穩自在， 直到欲埋歹人的墓掘好勢。

¹⁴ 上主一定𣍐放拺伊的子民， 嘛𣍐放棄伊的產業以色列。

¹⁵ 伊會閣照公義審判， 心正直的人攏會隨伊。

¹⁶ 啥人會為我起來攻擊歹人？ 啥人會為我徛起來攻擊做歹的人？

¹⁷ 若毋是上主幫贊我， 我真緊就落去永遠靜默的所在。

¹⁸ 我講「我的腳踏跙去」； 彼時，上主啊，你用慈愛扶持我。

¹⁹ 我心內有真多憂悶掛慮， 你的安慰互我心神快樂。

²⁰ 腐敗的官長利用法律製造奸惡， 𪜶豈會及你徛仝旁？

²¹ 𪜶鬥陣計謀欲害義人的性命， 給無罪的人定死罪。

²² 毋拘上主做我的堡壘； 我的上帝做我的避難所。

²³ 伊互𪜶的罪惡受著報應； 𪜶做歹的時，伊欲剿滅𪜶。 上主 — 咱的上帝欲剿滅𪜶。