Si-phian 92 - 現代台語譯本漢字版

頌讚上主的公正及慈愛

安歇日的詩歌。

¹ 上主啊，阮感謝你； 至高者啊，唱歌稱讚你的名實在真好！

² 阮早起時報揚你的慈愛， 下昏時報揚你的信實，

³ 彈十條弦的豎琴， 用樂器美妙的聲音伴奏。

⁴ 上主啊，你用你的作為互我歡喜； 我欲因為你的手的所做唱歌快樂。

⁵ 上主啊，你的作為赫呢偉大， 你的意念赫呢深奧；

⁶ 無智識的人𣍐了解， 愚戇的人嘛𣍐明白。

⁷ 歹人親像草茂盛； 做歹的人雖然興旺， 一定攏會滅亡。

⁸ 總是上主你至尊，永遠掌權。

⁹ 上主啊，你的對敵一定滅亡； 所有做歹的人攏會受拍散。

¹⁰ 總是你有加添我的氣力，互我親像野牛赫呢勇壯， 因為你有用新的油倒佇我身上。

¹¹ 我親目看著我的對敵受報應， 親耳聽著攻擊我的歹人受刑罰。

¹² 義人會興旺親像棕樹， 會生長親像黎巴嫩的柏香樹；

¹³ 諸個樹栽佇上主的殿， 佇咱上帝的埕茂盛。

¹⁴ 樹老的時猶會結果子， 汁真多，色青翠，

¹⁵ 啲顯示上主公正，攏無不義； 伊是保護我的石磐。