Si-phian 90 - 現代台語譯本漢字版

第四卷 (90-106 篇) 上帝及人

上帝重用的人摩西的祈禱。

¹ 主啊，你世世代代是阮的避難所。

² 眾山猶未受造， 大地及世界猶未造成， 你永永遠遠是上帝！

³ 你互土造的人歸回土粉， 講：「人啊，著回歸原本。」

⁴ 對你來看，一千年親像過去的昨日， 親像暗暝的一更。

⁵ 你用大水給人沖走； 人生親像一場眠夢， 親像草早起時茁芛；

⁶ 早起時發起來，茂盛， 暗時凋謝，焦去。

⁷ 阮因為你的受氣消滅， 因為你的大受氣驚惶。

⁸ 你將阮的罪過排佇你面前； 阮祕密的罪佇你面前暴露出來。

⁹ 阮的日子攏佇你的受氣下過去； 阮的一生親像吐一個氣。

¹⁰ 阮的歲壽不過是七十， 若勇健通到八十。 阮會當誇口的不過是勞苦憂愁； 人生親像啲飛，一目𥍉久就過去。

¹¹ 啥人感受會著你受氣的威力？ 啥人了解你受氣的可怕？

¹² 求你教阮會曉算家己的日子， 互阮的心有智慧。

¹³ 上主啊，你什麼時才欲改變心意？ 求你憐憫你的僕人。

¹⁴ 求你透早就互阮享受你的慈愛， 互阮一世人充滿歡喜快樂。

¹⁵ 你互阮一生有偌多艱苦災難， 求你嘛互阮一生享受赫多歡喜快樂。

¹⁶ 求你互你的僕人看見你的作為， 互阮的子孫看見你的榮耀。

¹⁷ 主 — 阮的上帝啊，求你賜福互阮！ 求你互阮一切的工作順利； 求你互阮的所做攏亨通。