Si-phian 9 - 現代台語譯本漢字版

感謝上帝的公義

大闢的詩，交互聖樂長；用高音唱。

¹ 上主啊，我欲全心感謝你； 我欲報揚你一切奇妙的作為。

² 我欲因為你歡喜快樂； 至高的上帝啊，我欲稱讚你的名。

³ 我的對敵越轉身撤退跋倒， 攏佇你的面前滅亡。

⁴ 你有替我申冤，替我辯護； 你坐佇寶座，照公義審判。

⁵ 你責備列邦，互歹人滅亡； 你永遠擦消𪜶的名。

⁶ 對敵受毀滅，永遠荒廢； 你毀壞𪜶的城， 無人閣會記得𪜶。

⁷ 毋拘上主坐位作王到永遠； 伊已經安置伊的寶座欲審判。

⁸ 伊欲照公義審判世間， 照正直裁判萬民。

⁹ 上主是受壓迫的人的要塞， 是𪜶患難的時的避難所。

¹⁰ 識你的名的人會倚靠你； 因為上主，你毋曾棄拺尋求你的人。

¹¹ 著稱讚佇錫安作王的上主， 將伊的作為報揚佇萬民的中間。

¹² 因為伊無𣍐記得困苦的人， 為人申冤的上帝會聽𪜶的哀求。

¹³ 上主啊，求你憐憫我， 你有對死亡的門救我出來； 求你監察怨恨我的人按怎啲苦楚我，

¹⁴ 互我通講起你一切通謳咾的代誌。 我欲佇錫安的城門為著你的拯救歡呼。

¹⁵ 列邦跋落家己所掘的陷坑； 𪜶的腳纏佇𪜶祕密張的羅網。

¹⁶ 上主已經顯明家己，施行審判； 歹人互家己手的所做纏著。

¹⁷ 歹人攏會落陰府； 毋認上帝的列邦嘛會按呢。

¹⁸ 散赤人一定𣍐永遠互上帝𣍐記得； 困苦人的向望一定𣍐永遠無去。

¹⁹ 上主啊，求你起來，毋通互人較贏； 求你互列邦佇你的面前受審判。

²⁰ 上主啊，求你互𪜶驚惶， 互列邦知家己不過是會死的人若定。