Si-phian 89 - 現代台語譯本漢字版

為面臨災難的國家祈禱

以斯拉人以探教示的詩。

¹ 我欲永遠唱歌稱讚上主的慈愛， 欲世世代代宣揚你的信實。

² 我曾講：「你的慈愛永遠堅立； 你的信實親像天𣍐動搖。」

³ 你有講：「我及我揀選的人立約， 對我的僕人大闢宣誓：

⁴ 『我欲建立你的後代到永遠， 堅固你的寶座到萬代。』」

⁵ 上主啊，願天稱讚你奇妙的作為， 天使佇聚會中頌讚你的信實。

⁶ 佇空中叨一個會比得上主？ 眾神明中叨一個會親像上主？

⁷ 伊佇天使的議會中是有大威嚴的上帝， 比一切佇伊四圍的神明閣較通驚畏。

⁸ 上主 — 萬軍的統帥上帝啊， 你的大權能叨一個會當及你比？ 你佇逐項代誌攏顯出信實。

⁹ 海水漲高，你給伊管制； 海湧夯起來，你互伊平靜。

¹⁰ 你一下手就拍碎海怪拉哈伯； 你用大氣力的手拍散對敵。

¹¹ 天屬你，地嘛你的； 世界及萬物攏是你所建立。

¹² 南及北是你所創造； 他泊山及黑門山攏歡喜稱讚你的名。

¹³ 你的手骨有權能； 你的手有力，你的正手攑高高。

¹⁴ 公義及正直是你寶座的地基； 慈愛及信實行佇你面前。

¹⁵ 會曉對你歡呼的人真有福氣！ 上主啊，𪜶欲隨你的面發出的光來行。

¹⁶ 𪜶歸日因為你的名歡喜， 因為你的公義快樂。

¹⁷ 你是𪜶奇妙的氣力； 因為你的恩典，阮會得著勝利。

¹⁸ 上主是阮的保護者； 以色列神聖的上帝是阮的君王。

上帝對大闢的應允

¹⁹ 你早曾佇異象中對你忠實的子民講： 「我有用花冠戴佇勇士的頭殼； 我對子民中揀選伊，高升伊。

²⁰ 我尋著我的僕人大闢， 用聖油抹伊。

²¹ 我的手欲支持伊； 我的手骨欲賜伊氣力。

²² 對敵無法度用計智贏過伊； 兇惡的人無法度窘迫伊。

²³ 我欲佇伊的面前拍碎伊的對敵， 拍敗許個怨恨伊的人。

²⁴ 我的信實及我的慈愛欲及伊同在， 因為我的名，伊會得著勝利。

²⁵ 我欲互伊的手伸到地中海， 伊的正手伸到幼發拉底河。

²⁶ 伊欲對我講：『你是我的父，我的上帝， 是拯救我的石磐。』

²⁷ 我欲設立伊做大子， 做世上上大的君王。

²⁸ 我欲對伊持守慈愛到永遠； 我及伊所立的約一定𣍐改變。

²⁹ 我欲保守伊的後代到永遠， 互伊的寶座親像天赫呢久長。

³⁰ 「伊的子孫若棄拺我的律法， 無遵守我的命令，

³¹ 違背我的規例， 無遵行我的誡命，

³² 我欲用柺仔刑罰𪜶的過失， 用鞭處罰𪜶的罪惡。

³³ 總是我一定𣍐對伊收回我攏總的慈愛， 嘛𣍐違背我的信實。

³⁴ 我一定𣍐違反我的約， 嘛𣍐改變我講的話。

³⁵ 「我指家己的聖潔堅決立誓， 絕對𣍐對大闢講白賊。

³⁶ 伊的後代會傳到永遠， 伊的寶座佇我的面前親像日頭赫呢久長；

³⁷ 親像月永遠穩固， 佇天頂作確實的見證。」

為君王戰敗哀傷

³⁸ 總是你有對你抹油選立的發受氣， 給伊拒絕棄拺。

³⁹ 你廢除及你的僕人所立的約， 將伊的花冠擲佇土腳踐踏。

⁴⁰ 你拆毀伊所有的城牆， 互伊的堡壘變做拋荒的所在。

⁴¹ 過路人攏給伊搶奪； 隔壁國攏給伊凌辱。

⁴² 你互伊對敵的正手攑高， 互𪜶攏歡喜。

⁴³ 你互伊的刀劍鈍去𣍐當用， 互伊佇交戰的時戰敗。

⁴⁴ 你將伊權柄的柺搶起來， 將伊的寶座捙倒佇地裡。

⁴⁵ 你減少伊少年的日子， 互伊大大見笑。

懇求上帝拯救

⁴⁶ 上主啊，你欲匿偌久，到永遠是無？ 你親像火𤏸啲受氣欲偌久？

⁴⁷ 求你帶念我的性命赫呢短， 你創造的世間人赫呢空虛！

⁴⁸ 啥人會當久長活啲，無見著死， 會救家己的性命脫離陰府的權勢？

⁴⁹ 主啊，你以前的慈愛佇叨位？ 你對大闢立誓應允的信實佇叨位？

⁵⁰ 主啊，求你會記得你的僕人所受的凌辱， 會記得我的心按怎承受列國的侮辱。

⁵¹ 上主啊，你的對敵按呢啲侮辱你的僕人； 你抹油揀選的行到叨位，𪜶攏隨啲給伊凌辱。

⁵² 願稱讚歸互上主到永遠！ 阿們！阿們！