Si-phian 86 - 現代台語譯本漢字版

求主施恩保護

大闢的祈禱。

¹ 上主啊，求你俯耳孔聽我，應我， 因為我困苦散赤。

² 求你保存我的性命，因為我信靠你。 我的上帝啊，你的僕人倚靠你；求你拯救我。

³ 主啊，求你憐憫我， 因為我歸日求叫你。

⁴ 主啊，求你互你的僕人心神歡喜， 因為我仰望你，對你祈禱。

⁵ 主啊，你良善，歡喜赦免； 你賜豐盛的慈愛互所有求叫你的人。

⁶ 上主啊，求你俯耳孔聽我的祈禱， 俯落聽我懇求的聲。

⁷ 我佇患難的日求叫你， 因為你會應我。

⁸ 主啊，諸個神明無一個會當及你相比； 𪜶的所做嘛𣍐當及你比。

⁹ 主啊，你所造的萬民攏會來到你的面前仆拜； 𪜶會榮耀你的名。

¹⁰ 因為你偉大，做奇妙的事； 只有你是上帝。

¹¹ 上主啊，求你將你的道路指示我， 我欲照你的真理來行； 求你互我用專一的心敬畏你的名。

¹² 主 — 我的上帝啊，我欲全心稱讚你； 我欲永遠榮耀你的名。

¹³ 你施落互我的慈愛赫呢大， 有救我的性命免落陰府上深的所在。

¹⁴ 上帝啊，驕傲的人起來攻擊我； 歸陣強暴的人數想我的性命； 𪜶無將你囥佇眼中。

¹⁵ 主啊，你是仁慈恩典的上帝， 無快受氣，閣有豐盛的慈愛及信實。

¹⁶ 求你越過來看我，可憐我， 將你的氣力賜互你的僕人， 救你女婢的子。

¹⁷ 求你顯示恩待我的證據， 互怨恨我的人看著來見笑， 因為上主你有幫贊我，安慰我。