Si-phian 85 - 現代台語譯本漢字版

求上主恩待伊的子民

可拉後代的詩，交互聖樂長。

¹ 上主啊，你有施恩互你的地； 以色列受掠的人你有解救𪜶倒來。

² 你有赦免你子民的罪惡， 擦消𪜶一切的罪過。

³ 你有收回你攏總的受氣， 煞你猛烈的受氣。

⁴ 拯救阮的上帝啊，求你互阮倒轉來， 煞你對阮的受氣。

⁵ 你豈欲永遠對阮受氣？ 豈欲繼續受氣到萬代？

⁶ 你豈毋閣給阮救活， 互你的子民因為你來歡喜？

⁷ 上主啊，求你互阮經驗你不變的疼， 將你的救恩賜互阮。

⁸ 我欲聽主上帝所欲講的話； 因為伊欲對伊的子民，就是聖的子民，應允賜平安繁榮； 總是𪜶毋通倒轉去行愚戇的路。

⁹ 伊一定會拯救敬畏伊的人， 互伊的榮光臨在佇咱境內。

¹⁰ 慈愛及信實相抵； 公義及和平相攬。

¹¹ 信實對地發出； 公義對天降落。

¹² 上主賜好物； 咱的土地大豐收。

¹³ 公義會行佇上主頭前， 為伊準備道路。