Si-phian 84 - 現代台語譯本漢字版

欣慕上帝的殿院

可拉後代的詩，交互聖樂長；用迦特的樂器伴奏。

¹ 上主 — 萬軍的統帥啊， 你徛起的所在互人赫呢意愛！

² 我戀慕上主的埕到欲暈去！ 我的心神向永活的上帝歡喜唱歌。

³ 上主 — 萬軍的統帥，我的王，我的上帝啊， 雀鳥仔佇你的祭壇邊作巢； 連燕仔嘛佇遐為著家己尋著攔子的巢。

⁴ 徛起佇你殿的埕的人真有福氣！ 𪜶稱讚你無煞！

⁵ 對你得著氣力的人真有福氣！ 𪜶迫切愛上錫安山朝聖。

⁶ 𪜶經過的焦燥山谷攏變做泉源； 秋雨降落，福氣滿滿。

⁷ 𪜶愈行愈有力， 攏欲佇錫安朝見上帝。

⁸ 上主 — 萬軍的統帥上帝啊，求你聽我的祈禱！ 雅各的上帝啊，求你俯耳孔來聽！

⁹ 保護阮的上帝啊，求你眷顧！ 求你賜福互你所設立的王！

¹⁰ 佇你的埕𫢶一日， 較贏佇別位𫢶一千日！ 我寧可佇我上帝的厝顧門， 嘛毋願𫢶佇邪惡的人的厝內。

¹¹ 因為主上帝是日頭，是盾牌： 伊互咱恩惠及光榮； 伊毋曾留一項好物無互正直的人。

¹² 上主 — 萬軍的統帥啊，信靠你的人真有福氣！