Si-phian 83 - 現代台語譯本漢字版

求上主消滅對敵

亞薩的詩。

¹ 上帝啊，求你毋通恬恬； 上帝啊，求你毋通無開嘴，無出聲。

² 因為你的對敵啲擾亂； 怨恨你的人啲反叛。

³ 𪜶用奸詐的計謀欲害你的子民； 𪜶參詳欲害你保護的人。

⁴ 𪜶講：「來，咱來消滅𪜶，互𪜶亡國， 互以色列的名永遠消失。」

⁵ 𪜶同心參詳， 立約聯盟欲對抗你；

⁶ 𪜶就是住布棚的以東及以實瑪利人， 摩押及夏甲人，

⁷ 迦巴勒、亞捫，及亞瑪力、 非利士，以及泰爾的住民；

⁸ 亞述嘛及𪜶聯合， 做羅得子孫的聯盟。

⁹ 求你對付𪜶親像對付米甸人， 親像你佇基順河對付西西拉及耶賓。

¹⁰ 𪜶佇隱‧多珥滅亡， 變做地上的糞埽。

¹¹ 求你互𪜶的領袖親像俄立及西伊伯， 互𪜶的軍長攏親像西巴及撒慕拿。

¹² 𪜶講：「咱著來去， 給上帝的牧場佔做咱的。」

¹³ 我的上帝啊，求你互𪜶親像捲螺仔風捲起來的塵埃， 親像互風吹走的草仔幼。

¹⁴ 火按怎燒樹林， 火焰按怎燒山嶺，

¹⁵ 求你嘛按呢用你的狂風追趕𪜶， 用你的暴雨互𪜶驚惶。

¹⁶ 上主啊，求你互𪜶滿面見笑， 通來尋求你。

¹⁷ 願𪜶永遠見笑驚惶； 願𪜶漏氣滅亡。

¹⁸ 願𪜶知只有你是上主， 是掌管全地至高的上帝。