Si-phian 81 - 現代台語譯本漢字版

上帝的良善及以色列的邪惡

亞薩的詩，交互聖樂長；用迦特的調。

¹ 上帝是咱的氣力，著大聲稱讚伊； 著唱歌稱讚雅各的上帝。

² 著唱詩歌，搖玲瓏鼓， 彈好聽的琴及瑟。

³ 著佇初一十五， 咱節期的日，歕哨角。

⁴ 因為這是為以色列定的規例， 是雅各的上帝為𪜶設的禮儀。

⁵ 伊攻擊埃及地的時， 有及以色列的子民立約。 佇遐我聽見以前毋曾聽著的話。

⁶ 上帝講：「我將𪜶肩頭頂的重擔徙開， 互𪜶放落手所捾重的籃仔。

⁷ 恁佇患難中求叫，我有解救恁； 我對雷啲彈的密雲中應答恁， 佇米利巴的水泉邊試驗恁。

⁸ 我的子民啊，恁著聽，我欲警告恁； 以色列啊，我偌仔呢向望恁聽趁我！

⁹ 恁中間毋通有別個神明； 外邦的神明，恁毋通跪拜。

¹⁰ 我是上主 — 恁的上帝； 我曾導恁對埃及地上來。 恁的嘴著大開，我就互恁飽足。

¹¹ 「毋拘我的子民毋聽我的話； 以色列攏毋插我。

¹² 我就出在𪜶心硬， 互𪜶照家己所愛去做。

¹³ 我偌仔呢向望我的子民聽趁我， 以色列肯行我的路！

¹⁴ 我真緊就會制壓𪜶的對敵， 用手倒抉攻擊𪜶的敵人。

¹⁵ 怨恨上主的人會佇伊面前衰退； 𪜶會永遠受刑罰。

¹⁶ 上主欲用好的麥互以色列食， 用對石磐出的蜜互𪜶滿足。」