Si-phian 79 - 現代台語譯本漢字版

求主解救阮的國家

亞薩的詩。

¹ 上帝啊，外邦人侵佔你的領土， 拍垃墋你的聖殿， 互耶路撒冷變做荒廢的所在。

² 𪜶將你僕人的身屍交互空中的飛鳥做食物， 將你聖的子民的肉互地上的野獸吞食。

³ 𪜶佇耶路撒冷周圍流你子民的血親像啲摒水， 嘛無人給𪜶埋葬。

⁴ 阮受著隔壁國凌辱， 互四圍的人冷笑譏刺。

⁵ 上主啊，你欲受氣偌久，豈欲到永遠？ 你的大受氣親像火欲𤏸偌久？

⁶ 求你將你的受氣摒落佇許個毋識你的外邦， 以及許個無求叫你的名的列國。

⁷ 因為𪜶吞食雅各， 互伊徛起的所在拋荒。

⁸ 求你毋通因為阮祖先犯的罪刑罰阮； 求你將你的慈悲緊緊施落互阮， 因為阮陷落絕望的地步。

⁹ 救阮的上帝啊，求你因為你的名的榮光幫贊阮； 因為你的名的緣故救阮，赦免阮的罪。

¹⁰ 哪欲互列國講：「𪜶的上帝佇叨位？」 求你為著你僕人流的血申冤， 互外邦人知，閣互阮親目看見。

¹¹ 求你互囚犯的吐氣透到你的面前， 照你的大權能，保存受判死刑的人的性命。

¹² 主啊，阮隔壁國對你的凌辱， 求你加添七倍還互𪜶。

¹³ 按呢，阮做你的子民，你草埔的羊的人， 會感謝你到永遠， 稱讚你的名到萬世代。