Si-phian 78 - 現代台語譯本漢字版

上帝引導背逆的子民

亞薩教示的詩。

¹ 我的子民啊，著聽我的教示， 注意聽我講的話。

² 我欲開嘴講譬喻， 欲講出古早的奧祕，

³ 就是阮所聽見，所知， 阮的祖先所傳互阮的事。

⁴ 阮無欲將諸個事對子孫隱瞞， 欲將上主的名聲及伊的權能， 以及伊所做奇妙的事，傳互後世代。

⁵ 伊佇雅各設誡命，佇以色列定律法， 閣命令咱的祖先將諸個傳互𪜶的子孫，

⁶ 互後代，就是啲欲出世的子孫知； 諸個子孫嘛欲傳互𪜶的子子孫孫。

⁷ 按呢，𪜶通將向望囥佇上帝， 互𪜶無𣍐記得上帝的作為， 遵守伊的誡命；

⁸ 才免親像𪜶祖先的世代，硬心背逆； 𪜶對上帝心無堅定，心靈無真實。

⁹ 以法蓮的子孫攑武器及弓箭， 爭戰的日，卻越轉身逃走。

¹⁰ 𪜶無遵守上帝的約， 拒絕照伊的律法生活。

¹¹ 𪜶𣍐記得伊的作為， 𣍐記得伊互𪜶看見奇妙的事。

¹² 伊佇埃及地，瑣安的田野， 佇𪜶祖先的目睭前做奇異的事。

¹³ 伊給海分開，互𪜶過去； 伊互水徛起來親像壁。

¹⁴ 伊日時用雲導𪜶， 歸暝用火的光引導𪜶。

¹⁵ 伊佇曠野互石磐爆裂， 互𪜶有真多水通飲， 親像對深淵淐出。

¹⁶ 伊互水對石磐淐出， 親像江河流落來。

¹⁷ 毋拘𪜶猶繼續得罪伊， 佇曠野背逆至高上帝。

¹⁸ 𪜶心內試探上帝， 照家己意愛的求食物。

¹⁹ 𪜶濫糝議論上帝，講： 「上帝豈會佇曠野辦桌？

²⁰ 伊曾摃石磐，互水淐出， 溪水滿出來； 伊豈會賜米糧？ 伊豈會給伊的子民準備肉？」

²¹ 所以，上主聽著就受氣， 用炎火燒雅各， 對以色列發受氣。

²² 因為𪜶毋信服上帝， 毋倚靠伊的救恩。

²³ 毋拘伊猶命令頂面的穹蒼， 閣開天的門；

²⁴ 伊降落嗎哪互𪜶食， 將天的米糧賜互𪜶。

²⁵ 𪜶逐個人食天使的食物； 上帝賜米糧互𪜶食到飽。

²⁶ 伊對天起東風， 用伊的權能吹南風，

²⁷ 伊降落肉互𪜶，若土粉赫多， 降落飛鳥若海沙赫多，

²⁸ 落佇𪜶的營中， 佇𪜶徛起的所在的四圍。

²⁹ 𪜶就食，食到飽飽； 伊有照𪜶所愛的互𪜶。

³⁰ 𪜶所愛的猶未飽足， 食物猶佇嘴內的時，

³¹ 上帝就對𪜶發受氣， 刣死𪜶中間勇壯的人， 拍倒以色列的少年人。

³² 雖然按呢，𪜶繼續犯罪， 無因為上帝奇妙的作為來信伊。

³³ 所以伊互𪜶空空過日， 互𪜶年年佇驚惶中經過。

³⁴ 上帝刣𪜶的時，𪜶才來求伊； 越倒轉迫切尋求伊。

³⁵ 𪜶才會記得上帝是𪜶的保護者， 至高者上帝是𪜶的救贖主。

³⁶ 毋拘𪜶用嘴給伊扶挺， 用舌對伊講白賊。

³⁷ 𪜶對伊無忠信， 無真實守伊的約。

³⁸ 毋拘伊猶充滿憐憫， 赦免𪜶的罪過，無給𪜶毀滅， 一遍閣一遍忍啲， 受氣無攏發出來。

³⁹ 伊帶念𪜶不過是會死的人， 是吹過去𣍐閣倒轉來的風。

⁴⁰ 𪜶佇曠野不時背逆伊， 佇荒埔互伊憂悶。

⁴¹ 𪜶一遍閣一遍試探上帝， 激以色列神聖的上帝受氣。

⁴² 𪜶𣍐記得伊的權能， 𣍐記得伊解救𪜶脫離對敵的日。

⁴³ 伊佇埃及按怎行神跡， 佇瑣安的田野顯出奇事：

⁴⁴ 伊將𪜶的江河變做血， 致到水攏𣍐飲得。

⁴⁵ 伊互歸群胡蠅來𪜶遐吞食， 互田蛤仔來損害。

⁴⁶ 伊將𪜶的土產互草蜢公毀壞， 將𪜶勞苦得著的物互草蜢吞食。

⁴⁷ 伊落雹毀壞𪜶的葡萄樹， 落霜毀壞𪜶的桑材樹；

⁴⁸ 閣將𪜶的牲生交互冰雹， 將𪜶歸群的牲生交互熠爁。

⁴⁹ 伊發大受氣， 用受氣、痛恨、苦難 做歸陣的使者來給𪜶毀滅。

⁵⁰ 伊忍𣍐牢受氣， 無顧念𪜶的性命， 用瘟疫給𪜶毀滅。

⁵¹ 伊刣死埃及所有的大子， 佇含的布棚拍死𪜶的頭上子。

⁵² 伊親像啲導羊給家己的子民導出來， 導𪜶經過曠野。

⁵³ 伊導𪜶，互𪜶安穩無驚惶， 互海淹死𪜶的對敵。

⁵⁴ 伊閣導𪜶到聖地的境內， 到伊用氣力得著的山地。

⁵⁵ 伊佇𪜶的面前趕出列邦； 用索仔量土地互以色列的支族做產業， 互𪜶徛起佇家己的布棚。

⁵⁶ 𪜶猶原試探至高者上帝，背逆伊， 無守伊的誡命。

⁵⁷ 𪜶失信背逆，及𪜶的祖先像款， 親像冗去的弓𣍐靠得。

⁵⁸ 𪜶拜山頭壇，惹伊受氣， 拜雕刻的偶像，互伊痛恨。

⁵⁹ 上帝聽著真受氣， 就完全棄拺以色列。

⁶⁰ 伊棄拺示羅的會幕， 棄拺伊佇人的中間所搭的布棚。

⁶¹ 伊允准人給約櫃搶去， 將伊的氣力及榮光交互對敵。

⁶² 伊對伊的家業以色列發受氣， 將伊的子民交互對敵殺害。

⁶³ 𪜶的少年人受戰火燒滅； 𪜶的在室女𣍐當聽著結婚的祝歌。

⁶⁴ 𪜶的祭司倒佇刀下； 𪜶的寡婦哭𣍐出來。

⁶⁵ 彼時主親像人睏精神， 親像勇士酒後喊喝。

⁶⁶ 伊就給對敵拍退， 互𪜶永遠受凌辱。

⁶⁷ 伊棄拺約瑟的後代， 無揀選以法蓮支族。

⁶⁸ 伊揀選猶大支族， 伊所意愛的錫安山。

⁶⁹ 伊起造聖所親像天赫高， 親像伊建立的大地永遠堅固。

⁷⁰ 伊揀選伊的僕人大闢， 對羊椆導伊出來，

⁷¹ 互伊無閣養飼羊群， 是欲互伊牧養主的子民雅各，伊的家業以色列。

⁷² 大闢就用純正的心牧養𪜶， 用老練的手引導𪜶。