Si-phian 74 - 現代台語譯本漢字版

求上主解救國家

亞薩教示的詩。

¹ 上帝啊，是按怎你永遠放拺阮？ 是按怎你對你草埔的羊發受氣，氣甲鼻孔淐煙？

² 求你會記得你早前揀選的子民， 你所贖回做你產業的民族， 嘛會記得你所徛起的錫安山。

³ 求你行來久久拋荒的所在， 看對敵徹底毀壞的聖所。

⁴ 你的對敵佇你殿內歡呼， 𫞼𪜶的旗做記號，

⁵ 親像人攑斧頭， 剉樹林的樹。

⁶ 聖所內面一切的雕刻， 𪜶用斧頭及槌攏總破壞。

⁷ 𪜶放火燒毀你的聖所， 拍垃墋你徛起的所在。

⁸ 𪜶參詳講：「咱來給𪜶徹底毀壞。」 𪜶將逐位敬拜上帝的所在攏燒了了。

⁹ 阮無閣看見兆頭， 嘛無閣有先知； 此款情形會到什麼時，阮中間無人知。

¹⁰ 上帝啊，對敵譏刺會到什麼時？ 敵人褻瀆你的名會到永遠嗎？

¹¹ 你是按怎手勼起來毋插阮？ 求你手伸出來給𪜶毀滅。

¹² 總是上帝對古早就是我的王， 佇地上施行拯救。

¹³ 你曾用你的權能將海分開， 摃破水中海怪的頭殼。

¹⁴ 你曾摃碎海獸的頭殼， 互曠野的野獸做食物。

¹⁵ 你曾分開水源及河流， 曾互長流的江河焦去。

¹⁶ 日時及暝時，是你所安排； 日頭及光體是你所創造。

¹⁷ 地上一切的界限是你所定； 夏天及冬天是你所設。

¹⁸ 上主啊，求你記得對敵按怎啲誹謗， 愚戇的人按怎啲褻瀆你的名。

¹⁹ 求你毋通將馴良子民的性命交互野獸， 毋通永遠𣍐記得你散赤的族群。

²⁰ 求你會記得及阮立的約， 因為地上烏暗的所在攏是強暴的人的巢穴。

²¹ 求你毋通互受壓制的人見笑轉去； 求你互困苦散赤的人稱讚你的名。

²² 上帝啊，求你起來為家己辯護， 會記得戇人歸日按怎啲誹謗你。

²³ 求你毋通𣍐記得你對敵的喊喝， 毋通𣍐記得起來攻擊你的人無停的嗆聲。