Si-phian 73 - 現代台語譯本漢字版

第三卷 (73-89 篇) 上帝最後會施行公義

亞薩的詩。

¹ 上帝實在好款待以色列， 好款待許個心清氣的人。

² 雖然按呢，我的腳險險踏脫去； 我的腳步險險行偏去。

³ 因為我有看著歹人及驕傲的人興旺， 我就怨妒不平。

⁴ 𪜶一生攏毋曾艱苦， 身軀勇壯好看。

⁵ 𪜶無親像別人拖磨勞苦， 嘛無親像別人受著災禍。

⁶ 所以𪜶用驕傲做袚鍊掛佇頷頸， 用暴力做衫穿。

⁷ 𪜶身軀肥，目睭酣， 心充滿邪念。

⁸ 𪜶恥笑，惡意中傷人； 𪜶講大聲話壓制人。

⁹ 𪜶的嘴褻瀆天； 𪜶的舌咒罵地。

¹⁰ 連上帝的子民都歸倚𪜶， 全盤接受𪜶所講的話。

¹¹ 𪜶講：「上帝哪會知？ 至高上帝豈會識？」

¹² 看，諸個是歹人； 𪜶不時無煩無惱，財寶愈加添。

¹³ 我保守我的心清氣實在無採工； 我洗手無沐著罪惡嘛是空空。

¹⁴ 因為我歸日抵著災難， 逐早起受著譴責。

¹⁵ 我若講我欲照𪜶按呢講， 就對你的子民無忠實。

¹⁶ 我想欲了解此個代誌， 毋拘無法度；

¹⁷ 到入去上帝的聖所， 我才明白𪜶的結局。

¹⁸ 你一定會給𪜶囥佇滑滑的所在， 互𪜶摔倒滅亡。

¹⁹ 𪜶互恐怖吞滅， 一目𥍉久就滅亡。

²⁰ 親像人睏醒就知𪜶的眠夢是幻想， 主啊，你一下起來，歹人嘛按呢消失。

²¹ 我的心真酸， 我的心情苦痛。

²² 我愚戇，無知， 佇你的面前親像牲生。

²³ 總是我不時及你做夥； 你牽我的正手，

²⁴ 用你的教示引導我， 接納我，互我得著尊榮。

²⁵ 佇天頂，你以外我有什麼人？ 佇地上，你以外我無所意愛。

²⁶ 我的肉體，我的心神會衰弱， 毋拘上帝永遠是我的氣力及產業。

²⁷ 離開你遠遠的人一定滅亡； 放拺你，背叛你的人，你攏會給𪜶消滅。

²⁸ 對我來講，親近上帝上好； 我尋至高的上主做避難所， 互我通宣揚你一切的作為。