Si-phian 72 - 現代台語譯本漢字版

為君王祈禱

所羅門的詩。

¹ 上帝啊，求你將你公正的判斷賜互王； 求你將你的公義賜互王的子，

² 互伊會照公義審判你的子民， 照公正判斷屬你困苦受壓制的人。

³ 願大山帶和平互伊的百姓， 願小山互𪜶享受繁榮。

⁴ 伊會替百姓中困苦的人申冤； 伊會解救散赤人， 會拍碎壓迫者。

⁵ 願𪜶敬畏你日久月深， 直到萬世代。

⁶ 願王親像雨水落佇草割了的園， 親像及時的雨水潤澤土地。

⁷ 佇伊坐位的日子義人會興旺， 及月平久享受大和平。

⁸ 伊會掌權對此個海到彼個海， 對大河直到地極。

⁹ 住佇曠野的人會跪落佇伊面前； 伊的對敵會完全降服。

¹⁰ 他施及海島的列王來進貢； 示巴及西巴的王來獻禮物。

¹¹ 願列王攏仆落拜伊， 萬國攏服事伊。

¹² 因為散赤人求叫的時，伊會救𪜶； 困苦無依倚的人，伊嘛會救𪜶。

¹³ 伊會憐憫困苦散赤的人； 伊會拯救困苦人的性命。

¹⁴ 伊會救贖𪜶脫離壓迫及強暴； 伊看𪜶的性命做寶貝。

¹⁵ 願王萬歲！ 願伊接受示巴進貢的金。 願百姓時常為伊祈禱， 歸日祝福伊無停。

¹⁶ 願此個土地五穀豐收， 滿山坪有麥穗， 親像黎巴嫩的樹林赫呢旺。 願城內，人親像地上的草茂盛興旺。

¹⁷ 願伊的名留到永遠， 親像日頭久長流傳。 人會因為伊得著福氣； 萬國會稱伊有福氣。

¹⁸ 至高上主 — 以色列的上帝， 只有伊行奇異的事，應該受稱讚。

¹⁹ 願伊榮耀的名永遠受稱讚； 願伊的榮耀充滿全地。 阿們！阿們！

²⁰ 耶西的子大闢的祈禱到遮結束。