Si-phian 71 - 現代台語譯本漢字版

老人的祈禱

¹ 上主啊，我倚靠你； 求你互我永遠𣍐抵著見笑。

² 求你照你的公義拯救我，解放我； 求你俯耳孔聽我，救我。

³ 求你做我徛起的石磐，互我通時常𫢶遐。 你已經決定欲救我； 你是我的避難所，我的堡壘。

⁴ 我的上帝啊，求你救我脫離歹人的手， 脫離不義及殘忍的人的手頭。

⁵ 至高的上主啊，你是我的向望； 對我少年的時，你一直是我的倚靠。

⁶ 我對胎裡就受你扶持； 互我出老母的腹肚的，是你； 我欲不時稱讚你。

⁷ 真多人看我做奇怪； 毋拘你是我堅固的避難所。

⁸ 我的嘴充滿對你的稱讚， 歸日歸榮光互你。

⁹ 我年老的時，求你毋通放拺我； 我氣力衰荏的時，求你毋通離開我。

¹⁰ 我的對敵議論我； 當等欲害我性命的人啲參詳，

¹¹ 講：「上帝已經給伊放拺； 今來追伊，來掠伊；因為無人欲救伊。」

¹² 上帝啊，求你毋通放我遠遠毋插我； 我的上帝啊，求你趕緊來幫贊我。

¹³ 願控告我的人抵著見笑滅亡； 願計謀欲害我的人受凌辱漏氣。

¹⁴ 毋拘我欲時常仰望你， 欲一直稱讚你。

¹⁵ 雖然你公義的所做及拯救的作為算𣍐了， 猶久我的嘴歸日欲宣揚。

¹⁶ 我欲講起至高上主大權能的事， 干焦欲宣揚你的公義。

¹⁷ 上帝啊，對我少年的時你就教示我， 現在我猶啲報揚你奇妙的作為。

¹⁸ 上帝啊，到我年老，頭毛白的時，求你毋通放拺我， 互我通將你的氣力傳互下一代， 將你的大權能指示將來的人。

¹⁹ 上帝啊，你的公義高到抵天； 上帝啊，你有行偉大的事， 啥人會當及你比？

²⁰ 你互我經歷真多大災難， 猶久欲互我閣活起來， 對地下上深的所在閣起來。

²¹ 你會將尊榮加添互我， 閣再安慰我。

²² 我的上帝，我欲彈瑟稱讚你， 稱讚你的信實。 以色列神聖的上帝， 我欲彈琴稱讚你。

²³ 我是你所救贖的， 我欲用全性命大聲唱歌稱讚你。

²⁴ 我的舌欲歸日講起你的公義， 因為計謀欲害我的人已經受凌辱見笑。