Si-phian 7 - 現代台語譯本漢字版

祈求公義的審判

有關便雅憫人古實的代誌，大闢對上主唱的歌。

¹ 上主 — 我的上帝啊，求你做我的避難所保護我； 求你解救我脫離一切追趕我的人！

² 若無，𪜶會親像獅拆裂我， 拆甲碎糊糊嘛無人通救我。

^3-4 上主 — 我的上帝啊，我的手若有做毋著， 有對朋友用歹報好， 抑是無緣無故搶奪敵對我的人； 我若有做諸個代誌，

⁵ 就出在對敵趇我，到掠著我， 將我的性命踏佇土腳， 將我的尊嚴變做土粉。

⁶ 上主啊，求你起來，發出受氣， 徛起來對付我對敵的大受氣； 求你為著我醒起來，照你的旨意審判。

⁷ 願萬民攏聚集佇你周圍； 願你坐佇寶座治理𪜶。

⁸ 上主審判萬民。 上主啊，求你裁判， 判我做義，定我無罪。

⁹ 求你互歹人𣍐閣做歹，互義人徛在； 因為公義的上帝監察人的心腸。

¹⁰ 上帝是我的盾牌； 伊拯救心正直的人。

¹¹ 上帝是公義的審判官； 伊逐日對不義的人發受氣。

¹² 人若毋反悔，伊會磨伊的刀， 扭開伊的弓準備好勢。

¹³ 伊準備致命的武器； 伊射的是火的箭。

¹⁴ 你看，歹人圖謀邪惡， 懷孕毒害，生出奸詐。

¹⁵ 伊挖窟，掘互伊深， 竟然跋落家己設的陷阱。

¹⁶ 伊的毒害會倒轉到家己的頭殼； 伊的強暴會落佇家己的頭殼頂。

¹⁷ 我欲因為上主的公義感謝伊； 我欲稱讚上主 — 至高上帝的名。