Si-phian 68 - 現代台語譯本漢字版

勝利的歌

大闢的詩歌，交互聖樂長。

¹ 願上帝起來，互伊的對敵四散， 互怨恨伊的人對伊的面前逃走。

² 你給𪜶趕散，親像給煙吹散； 𪜶親像蠟見著火就熔去， 歹人見著上帝的面就消滅。

³ 願義人佇上帝面前歡喜快樂； 願𪜶歡歡喜喜。

⁴ 著對上帝吟詩，唱歌稱讚伊的名， 大大稱讚坐雲來的彼位； 伊的稱呼是上主。 著佇伊的面前快樂。

⁵ 上帝佇伊聖的所在 做孤兒的父，寡婦的保護者。

⁶ 上帝互孤單的人有厝通住， 導關監的人出來得著自由享福； 毋拘伊互背逆的人𫢶佇曠旱的地。

⁷ 上帝啊，早你行佇你的子民頭前， 經過曠野；

⁸ 地見著西奈的上帝，大振動； 天佇以色列的上帝面前落大雨。

⁹ 上帝啊，你落大雨， 互焦燥的土地得著潤澤，

¹⁰ 互你的族群佇遐徛起。 上帝啊，你互散赤人得著恩惠。

¹¹ 主出命令； 一大陣婦女傳好消息：

¹² 「君王及𪜶的軍隊攏逃走啦，逃走啦！」 留佇厝內的婦女嘛分著戰利品。

¹³ 恁安穩倒佇羊椆內的時， 親像粉鳥的翼鑲白銀，毛鑲黃金。

¹⁴ 全能者佇境內趕散列王的時， 勢面親像撒們山啲落雪。

¹⁵ 巴珊山是極其高大的山； 巴珊山是有真多山嶺的山。

¹⁶ 有真多山尖的山啊， 恁是按怎怨妒啲看上帝所愛徛起的山？ 上主會𫢶佇遐到永遠。

¹⁷ 上帝有戰車千千萬萬； 主對西奈出來，來到伊的聖所。

¹⁸ 你已經上到高的所在，給俘虜掠來； 你對人接受貢品，甚至接受背叛的人的禮物， 互主上帝你佇𪜶中間徛起。

¹⁹ 主應該受稱讚，伊日日背咱的擔； 伊就是救咱的上帝。

²⁰ 咱的上帝是拯救的上帝； 只有主上帝會救咱脫離死亡。

²¹ 總是上帝欲拍破對敵的頭殼， 就是繼續犯罪的人的頭殼。

²² 主講：「我欲給𪜶對巴珊導來， 對海上深的所在導倒轉來，

²³ 互恁對𪜶的血中行過， 互恁的狗舐𪜶的血。」

²⁴ 上帝啊，你是我的上帝，我的君王。 人已經看見你啲行，行入聖所。

²⁵ 唱歌的行佇頭前，奏樂的隨佇後面， 搖玲瓏鼓的查某囝仔行佇中間。

²⁶ 著佇大會中稱讚上帝， 就是上主，以色列的源頭。

²⁷ 上細的便雅憫做頭啲導， 猶大歸群的族長、 西布倫的族長、拿弗他利的族長隨佇後面。

²⁸ 上帝啊，求你顯出氣力； 求你顯示你給阮做的事。

²⁹ 為著你佇耶路撒冷的殿， 列王欲帶禮物獻互你。

³⁰ 求你責備埃及，伊親像佇蘆葦中的野獸； 求你責備列邦，𪜶親像歸群的牛及牛仔。 求你互貪愛貢品的人屈服佇你腳下； 求你趕散好戰的列邦。

³¹ 特使欲帶貢品對埃及來； 古實欲趕緊對上帝獻禮物。

³² 世上的列國啊，著對上帝唱歌， 吟詩稱讚主，

³³ 稱讚坐佇對古早就有、極高的天彼位。 伊發出極大有力的聲。

³⁴ 恁著將權能歸互上帝。 伊的威嚴佇以色列的頂面； 伊的權能顯示佇穹蒼。

³⁵ 上帝啊，你佇你的聖所實在通敬畏； 以色列的上帝賜氣力權能互伊的子民。 上帝應該受稱讚！