Si-phian 67 - 現代台語譯本漢字版

感恩的詩

一篇詩歌，交互聖樂長；用弦的樂器伴奏。

¹ 願上帝憐憫阮，賜福互阮； 願你用仁慈款待阮，

² 通互全世界知你的旨意， 互萬國識你的救恩。

³ 上帝啊，願世間人攏稱讚你， 萬民攏謳咾你！

⁴ 願萬國快樂，唱歌歡喜！ 因為你照公義審判萬民， 引導世上萬國。

⁵ 上帝啊，願世間人攏稱讚你， 萬民攏謳咾你！

⁶ 土地有生產五穀； 上帝，阮的上帝有賜福互阮。

⁷ 願上帝賜福互阮！ 願全地攏敬畏伊！