Si-phian 66 - 現代台語譯本漢字版

稱讚上帝的救恩

一篇詩歌，交互聖樂長。

¹ 全地攏著對上帝出歡喜的聲，

² 唱歌稱讚伊名的榮光， 用讚美的話顯明伊的榮光。

³ 著對上帝講：「你的作為偌呢通驚畏！ 因為你的大權能，你的對敵會降服你。

⁴ 全地會敬拜你， 吟詩稱讚你； 會吟詩謳咾你的名。」

⁵ 來，來看上帝的作為； 伊對世間人的所做真通驚畏。

⁶ 伊互海變做焦地， 互伊的子民步行過河。 佇遐阮因為伊來歡喜。

⁷ 伊用伊的權能永遠統治； 伊的目睭監察列邦； 背逆的人毋通自高。

⁸ 萬民啊，著稱讚阮的上帝， 互人聽著稱讚伊的聲。

⁹ 伊保存阮的性命， 互阮堅固徛在。

¹⁰ 上帝啊，你有試驗阮， 鍛鍊阮親像鍛鍊銀。

¹¹ 你互阮入羅網， 用重擔硩佇阮身上。

¹² 你容允人駛車軋過阮的頭殼； 阮經過水及火。 總是你導阮到寬闊自由的所在。

¹³ 我欲帶燒化祭進入你的殿； 我欲對你謝我的願。

¹⁴ 我欲還佇患難的時嘴唇所講， 嘴所下的願。

¹⁵ 我欲獻肥的牲生做燒化祭， 獻綿羊、牛，及山羊， 將燒化祭的芳味獻互你。

¹⁶ 敬畏上帝的人攏著來聽； 我欲講起伊為我所做的事。

¹⁷ 我曾用我的嘴求叫伊， 用我的舌稱讚伊，尊崇伊。

¹⁸ 我心內若有囥歹的念頭， 主一定𣍐聽。

¹⁹ 毋拘上帝實在有聽見； 伊已經俯落聽我祈禱的聲。

²⁰ 上帝應該受稱讚； 伊毋曾拒絕我的祈禱， 毋曾互伊的慈愛離開我。