Si-phian 62 - 現代台語譯本漢字版

信靠上帝

大闢的詩，照耶杜頓的作法，交互聖樂長。

¹ 我的心神靜靜，專心聽候上帝； 我的拯救是對伊來。

² 只有伊是保護我的石磐，我的拯救； 伊是我的堡壘，我攏𣍐動搖。

³ 恁攻擊一個人欲到什麼時？ 恁親像啲拺敧斜的牆，欲倒的壁按呢給彼個人毀壞。

⁴ 恁鬥陣計謀，一直欲給伊對尊貴的位捙落去； 恁愛講白賊。 恁嘴祝福，心咒詛。

⁵ 我的心神啊，著靜靜，專心聽候上帝， 因為我的向望對伊來。

⁶ 只有伊是我的石磐，我的拯救； 伊是我的堡壘，我攏𣍐動搖。

⁷ 我的拯救，我的光榮在佇上帝； 伊是我的大石磐，我的避難所。

⁸ 萬民啊，著不時倚靠伊， 對伊吐露恁的心情。 上帝是咱的避難所。

⁹ 人真正是空虛， 會死的人攏是虛假， 下佇天秤一定浮起來； 𪜶合起來猶比呼吸的氣較輕。

¹⁰ 毋通靠暴力， 毋通靠搶奪； 財寶加添嘛毋通想欲靠伊。

¹¹ 上帝講一項， 我聽著兩項： 權能屬佇上帝，

¹² 慈愛嘛屬佇伊。 主啊，你欲照逐人的所做給伊報應。