Si-phian 57 - 現代台語譯本漢字版

求幫贊的祈禱

大闢閃避掃羅，匿佇洞內的時做此首金詩，交互聖樂長；調，用「毋通毀壞」。

¹ 上帝啊，求你可憐我，可憐我； 我欲匿佇你遐， 匿佇你翼股的保護下， 聽候災難攏過去。

² 我欲求叫至高的上帝， 逐項事攏給我完成的上帝。

³ 上帝會對天施恩救我， 互踐踏我的人失敗見笑。 上帝會對我施落慈愛及信實。

⁴ 我倒佇兇惡的人中間， 𪜶親像獅當等欲吞食人； 𪜶的嘴齒親像槍，親像箭， 𪜶的舌親像利的刀。

⁵ 上帝啊，願你的偉大𨃟過天， 你的榮光遍照全地。

⁶ 𪜶佇我的腳前設羅網， 欲互我屈服； 佇我的面前開陷坑， 家己顛倒跋落彼內面。

⁷ 上帝啊，我的心平靜，我的心堅定； 我欲吟詩，我欲唱歌稱讚。

⁸ 我的心神啊，著醒起來！ 琴啊，瑟啊，著醒起來！ 我欲給日頭叫醒。

⁹ 主啊，我欲佇萬民中感謝你， 佇列邦中唱歌稱讚你。

¹⁰ 你的慈愛若天赫呢高； 你的信實透到穹蒼。

¹¹ 上帝啊，願你的偉大𨃟過天； 願你的榮光遍照全地。