Si-phian 56 - 現代台語譯本漢字版

信靠上帝的祈禱

大闢的金詩，佇迦特互非利士人掠著的時做的，交互聖樂長；調，用「遠遠無聲的粉鳥」。

¹ 上帝啊，求你憐憫我，因為人踐踏我， 歸日攻擊壓制我。

² 我的對敵歸日踐踏我； 至高的上帝啊，攻擊我的人真多。

³ 我驚惶的時，我欲倚靠你。

⁴ 我倚靠上帝，我欲稱讚伊應允的話； 倚靠上帝，我就無驚。 會死的人會當給我按怎？

⁵ 𪜶歸日歪曲我的話， 所想的攏是欲害我。

⁶ 𪜶聚集，埋伏，啲相我的腳步， 當等欲害我的性命。

⁷ 𪜶做歹豈會當逃脫？ 上帝啊，求你發受氣互諸個對敵屈服。

⁸ 我的悲傷，你有記錄； 求你將我的目屎收佇你的皮袋。 諸個豈無攏記佇你的冊？

⁹ 我求叫的時，對敵攏會越轉身退去； 我知，上帝為我。

¹⁰ 我倚靠上帝，我欲稱讚伊應允的話； 我倚靠上主，我欲謳咾伊的話。

¹¹ 我倚靠上帝，我就𣍐驚； 人會當給我按怎？

¹² 上帝啊，我欲照我向你所下的願， 對你獻謝恩的祭。

¹³ 因為你有救我的性命脫離死亡， 保護我的腳無跋倒， 互我得著活命的光引導，行佇你面前。