Si-phian 55 - 現代台語譯本漢字版

受出賣的人的祈禱

大闢教示的詩，交互聖樂長；用弦的樂器伴奏。

¹ 上帝啊，求你俯耳孔聽我的祈禱， 毋通匿起來，毋聽我的懇求。

² 求你聽我，應我； 我操煩鬱卒，心不安，

³ 攏是因為對敵哄喝，歹人壓制； 𪜶將罪過疊起來硩我； 𪜶發受氣窘迫我。

⁴ 我的心攪絞痛苦； 死亡的驚惶臨到我。

⁵ 驚惶愕愕惙包圍我； 恐怖蓋密我。

⁶ 我講：「我真愛親像粉鳥有翼， 通飛去尋著安歇的所在。

⁷ 我欲飛去遠遠， 歇佇曠野，

⁸ 緊到避難的所在， 通脫離狂風暴雨。」

⁹ 主啊，求你拍亂𪜶的語言，互𪜶的話混亂； 因為我看著城內有強暴紛爭，

¹⁰ 歹人暝日佇城牆頂行踅， 城內充滿災難邪惡。

¹¹ 城內到處有破壞； 街路逐位有壓制及奸詐。

¹² 侮辱我的毋是對敵， 若是，我嘛猶會當容忍。 自高看輕我的毋是怨恨我的人， 若是，我嘛猶會當閃開。

¹³ 無拍算是你，及我仝身份的人， 是我的同伴，我知己的朋友。

¹⁴ 咱以前常常互相親密談論， 及眾人佇上帝的殿做夥敬拜。

¹⁵ 願死亡忽然臨到𪜶， 互𪜶活活落陰府； 因為𪜶徛起的所在充滿邪惡。

¹⁶ 我咧，我欲求叫上帝； 上主會救我。

¹⁷ 下昏，早起，中晝，我哀傷吐氣； 伊攏會聽我的聲。

¹⁸ 雖然反對我的人真多， 伊會救贖我的性命脫離攻擊我的人， 互我平安倒轉來。

¹⁹ 對古早永遠存在的上帝會聽見， 嘛會給𪜶報應； 因為𪜶毋改變，無欲敬畏上帝。

²⁰ 𪜶伸手攻擊家己的同伴， 違背及𪜶立的約。

²¹ 𪜶的嘴親像油滑溜溜； 𪜶的心藏怨恨； 𪜶的話比油較柔軟， 其實是拔出來的刀。

²² 著將你的擔卸互上主； 伊會扶持你，絕對𣍐互義人失敗。

²³ 刣死人的及奸詐的人𣍐活到中年； 上帝啊，你會互𪜶陷落佇死亡的深坑。 若是我，我欲倚靠你。