Si-phian 51 - 現代台語譯本漢字版

祈求赦免

大闢及拔示芭同房以後，先知拿單來見伊，伊做此首詩，交互聖樂長。

¹ 上帝啊，你的疼𣍐改變，求你憐憫我！ 你有豐富的慈愛，求你擦消我的罪過！

² 求你洗除我一切的罪， 洗清我的罪惡。

³ 我知家己的過失； 我的罪惡不時佇我的目睭前。

⁴ 我有得罪你，我得罪的是你； 我有做你看做邪惡的代誌。 所以，我受你審判是當然， 受你責罰是應該。

⁵ 我佇母胎就有罪， 出世彼日就是罪人。

⁶ 你意愛的是內心誠實； 求你教示我，互我心內有真正的智慧。

⁷ 求你洗除我的罪，互我清氣； 求你給我洗清氣，互我比雪較白。

⁸ 求你互我聽見歡喜快樂的聲， 互你拍碎的骨頭閣再歡喜快樂。

⁹ 求你面越走無看我的罪； 求你擦消我一切的罪惡。

¹⁰ 上帝啊，求你為我創造純潔的心； 求你賜我新閣忠誠的心靈。

¹¹ 毋通趕我離開你的面前； 毋通對我收回你聖的神。

¹² 求你互我重新享受你救恩的歡喜， 互我的心靈願意順服你。

¹³ 我欲將你的道路指示犯過失的人， 互罪人通歸向你。

¹⁴ 拯救我的上帝啊，求你免除我的死罪， 互我通大聲稱讚你的拯救。

¹⁵ 主啊，求你開我的嘴； 我欲稱讚你。

¹⁶ 你無愛牲禮，若愛，我歡喜獻； 我若獻燒化祭，你嘛無歡喜。

¹⁷ 上帝啊，你所愛的祭是痛悔的心靈； 憂傷痛悔的心，你歡喜接納。

¹⁸ 上帝啊，求你用慈愛好款待錫安， 重建耶路撒冷的城牆。

¹⁹ 彼時，你欲接納合宜的牲禮，全副的燒化祭； 人欲將牛獻佇你的祭壇。