Si-phian 50 - 現代台語譯本漢字版

真誠的敬拜

亞薩的詩。

¹ 上主 — 全能的上帝對東到西出聲， 呼召全地。

² 對媠無比的錫安， 上帝發出光。

³ 咱的上帝來臨，一定𣍐靜靜； 有炎火佇伊面前啲𤏸， 有暴風佇伊四圍啲掃。

⁴ 為著欲審判伊的子民， 伊召天及地來作證。

⁵ 伊講：「著召集我聖的子民來我遮， 就是用祭祀及我立約的人。」

⁶ 天欲顯明伊的公義； 因為上帝本身是審判者。

⁷ 「我的子民啊，著聽，我欲講； 以色列啊，我欲控告你。 我是上帝，你的上帝。

⁸ 我無因為你的祭祀責備你； 你的燒化祭時常佇我的面前。

⁹ 我毋免對你的牛椆接受公的牛， 嘛毋免對你的羊椆接受公的山羊。

¹⁰ 因為樹林內的百獸， 眾山的牲生攏屬我。

¹¹ 山內的飛鳥，我攏識； 曠野的走獸嘛攏屬我。

¹² 「我若枵，嘛𣍐給你講； 因為世界及萬物攏屬我。

¹³ 我豈會食牛的肉， 飲山羊的血？

¹⁴ 你著用感謝做祭獻互上帝； 著對至高者謝願。

¹⁵ 佇患難的日，你著求叫我； 我欲救你，你嘛著尊崇我。」

¹⁶ 毋拘上帝對歹人講： 「你哪有權唸我的規例， 嘴講我的約？

¹⁷ 其實你厭惡教示， 將我的話擲佇尻脊後。

¹⁸ 你見著賊就及伊同心， 及行姦淫的人鬥陣。

¹⁹ 「你的嘴講歹話； 你的舌製造奸詐。

²⁰ 你隨便講兄弟的是非， 誣賴你的親人。

²¹ 你做諸個代誌，我恬恬無出聲， 你煞想講我及你仝款。 毋拘我欲責備你， 將諸個代誌排佇你的目睭前。

²² 「恁諸個𣍐記得上帝的人啊，著想此個事， 才免我將恁拆碎，無人通救恁。

²³ 所有用感謝獻祭的人是啲尊崇我； 行正路的人，我欲互伊得著上帝的拯救。」