Si-phian 5 - 現代台語譯本漢字版

祈求保護的早禱

大闢的詩，交互聖樂長；用歕的樂器伴奏。

¹ 上主啊，求你聽我講， 知我的苦情。

² 我的王，我的上帝啊， 求你聽我求叫的聲，因為我對你祈禱。

³ 上主啊，早起時求你聽我的聲； 早起時我對你懇求，閣聽候。

⁴ 因為你毋是意愛罪惡的上帝； 邪惡，你𣍐容允。

⁵ 驕傲的人𣍐當徛佇你面前； 做歹的人攏是你所怨恨。

⁶ 講白賊的，你欲滅𪜶； 刣人及奸詐的，攏是上主所厭惡。

⁷ 毋拘因為你豐盛的慈愛，我會當入你的殿， 心存敬畏，佇你的聖殿敬拜。

⁸ 上主啊，對敵啲當等我， 求你照你的公義，導我行正直的路。

⁹ 𪜶的嘴無老實， 𪜶的心惡毒滿滿， 𪜶的嚨喉是開開的墓， 𪜶的舌𠢕扶挺。

¹⁰ 上帝啊，求你定𪜶的罪， 互𪜶陷落家己的計謀； 因為𪜶背叛你，罪過真重， 求你給𪜶趕出。

¹¹ 所有尋你做避難所的，求你互𪜶歡喜， 互𪜶歡喜出聲無停，因為你庇祐𪜶。 願許個意愛你的名的人攏因為你歡喜快樂。

¹² 上主啊，你欲賜福互義人； 你欲用恩惠，親像盾牌四面圍𪜶。