Si-phian 49 - 現代台語譯本漢字版

倚靠財富是愚戇

可拉後代的詩，交互聖樂長。

¹ 萬民啊，攏著聽； 世上攏總的住民啊，著俯耳孔聽。

² 無論卑賤尊貴， 好額散赤，攏著聽。

³ 我的嘴欲講智慧的話； 我的心欲想明理的事。

⁴ 我欲俯耳孔聽譬喻， 彈琴解說奧祕。

⁵ 歹人用詭詐包圍我， 佇患難的日，我嘛毋驚。

⁶ 𪜶倚靠財富，誇口好額；

⁷ 𪜶無一個有法度贖回家己， 嘛𣍐當用錢對上帝贖回性命。

⁸ 因為贖回性命的價錢傷貴， 永遠付𣍐起；

⁹ 人𣍐當久長活啲， 免受毀滅。

¹⁰ 有人看著智慧的人死， 愚戇無知的人嘛攏滅亡， 錢財攏留互別人。

¹¹ 𪜶想講𪜶的厝會永遠留啲， 𪜶徛起的所在會續到萬代， 所以用家己的名號家己的地。

¹² 毋拘人𣍐當久長享受富貴， 會親像牲生死去。

¹³ 這是倚靠家己的人所行的路， 是贊同𪜶的話的人的結局。

¹⁴ 親像註定落陰府的羊， 死亡做𪜶的牧者導𪜶一路到墳墓； 𪜶的身軀佇陰府消滅， 無閣有徛起的所在。

¹⁵ 毋拘上帝會贖回我脫離陰府的權勢； 因為伊會接納我。

¹⁶ 人發財，家庭加添光彩； 你毋免因為按呢著驚。

¹⁷ 因為伊死的時，無一項帶會去； 伊的榮華𣍐隨伊去。

¹⁸ 雖然伊在生家己誇耀有福氣， 成功得著人的謳咾，

¹⁹ 伊最後嘛著去見𪜶祖公， 永遠𣍐閣看見光。

²⁰ 人𣍐當久長享受富貴， 伊會親像牲生死去。