Si-phian 48 - 現代台語譯本漢字版

錫安 — 上帝的城

可拉後代的詩歌。

¹ 上主至大， 佇咱上帝的城， 佇伊聖的山， 應該大大受稱讚。

² 錫安山佇北面，高閣好看， 全地所歡喜，大君王的城。

³ 上帝佇城的要塞啲顧守， 互人知伊是避難所。

⁴ 看啊，列王聚集， 鬥陣進軍欲攻城。

⁵ 𪜶一下看著此個城就卬愕， 驚惶，趕緊逃走。

⁶ 𪜶佇遐愕愕惙， 親像催陣的婦仁人痛疼，

⁷ 親像他施的船互東風拍破。

⁸ 佇上主 — 萬軍的統帥的城內， 佇咱上帝的城中， 咱曾聽著，現在親目看著， 上帝欲顧守此個城到永遠。

⁹ 上帝啊，佇你的殿內， 阮數念你的慈愛。

¹⁰ 上帝啊，你的名傳到全地， 謳咾的聲透到天邊海角。 你的統治充滿公義，

¹¹ 你的判斷正確， 錫安山著歡喜， 猶大的城市著快樂。

¹² 恁著踅錫安，周圍踅一輪， 點算城塔，

¹³ 觀察城牆，欣賞堡壘， 通互恁對後代宣告：

¹⁴ 此位上帝是咱永永遠遠的上帝， 伊會永遠引導咱。