Si-phian 45 - 現代台語譯本漢字版

頌讚君王婚禮的詩

可拉後代教示的詩，是愛情的歌，交互聖樂長；調，用「百合花」。

¹ 我的心淐出美好的話； 我欲唱為著王做的詩， 我的舌親像作家老練的筆。

² 你比所有的查甫人較飄撇， 你講的話真優雅； 所以上帝賜福你，直到永遠。

³ 大權能的王，腰著縖劍， 顯示你的榮光及威嚴。

⁴ 為著真理、謙卑、公義， 你威嚴騎馬進前，百戰百勝； 你的正手做通驚畏的事。

⁵ 你的箭真利，射迵王對敵的心， 互𪜶攏倒佇你腳下。

⁶ 你的寶座是上帝所賜，續到永永遠遠； 你的國的權柄是正直的權柄。

⁷ 你意愛公義，厭惡不法。 所以上帝 — 你的上帝用歡喜的油抹你， 超過抹你的同伴。

⁸ 你的衣服有沒藥、沉香、肉桂的芳味； 對象牙的王宮有弦樂互你歡喜。

⁹ 你王妃的中間有列國的公主； 王后用上純的金妝飾，徛佇你正旁。

¹⁰ 查某囝仔啊，著斟酌聽，詳細想； 著𣍐記得你的百姓及你老父的家。

¹¹ 王會戀慕你的媠； 伊是你的主，你著順服。

¹² 泰爾的人民會來送禮物； 百姓中的好額人會來對你求恩情。

¹³ 王的新娘佇宮內非常榮華； 伊穿金線繡的禮服。

¹⁴ 伊穿繡花的禮服互人導到王面前； 伴嫁的在室女隨佇後面嘛來到你面前。

¹⁵ 𪜶歡喜快樂， 互人導入王宮。

¹⁶ 你的子孫會續接你的列祖； 你欲設立𪜶佇全地做王。

¹⁷ 我欲互你的名代代受記念； 萬民會永永遠遠稱讚你。