Si-phian 42 - 現代台語譯本漢字版

第二卷 (42-72 篇) 流亡者的祈禱

可拉後代教示的詩，交互聖樂長。

¹ 上帝啊，我的心迫切欣慕你， 親像鹿迫切欣慕溪水。

² 我的心嘴焦欣慕上帝，永活的上帝； 我什麼時會當到上帝面前去朝見？

³ 我暝日用目屎準飯吞； 我的對敵一直問我：「你的上帝佇叨位？」

⁴ 我早前導眾人做陣去上帝的厝， 用歡喜稱讚的聲大家守節。 我追念諸個代誌， 心非常悲傷。

⁵ 我的心啊，你是按怎鬱卒， 是按怎佇我內面哼哼呻？ 著仰望上帝； 我猶久欲稱讚伊， 因為伊是我的拯救者，我的上帝。

⁶ 我的心佇我內面鬱卒， 所以我欲對約旦的地、黑門、米薩的山數念你。

⁷ 你的瀑布出聲，深淵及深淵相呼應； 你的波浪，你的大湧淹密我。

⁸ 日時，上主施落伊的慈愛； 暝時，伊互我唱歌， 對賜我活命的上帝祈求。

⁹ 我欲對上帝 — 我的石磐講： 「你是按怎𣍐記得我？ 我是按怎著因為對敵的壓迫悲傷行來行去？」

¹⁰ 我的對敵欺負我，拍碎我的骨頭； 𪜶一直問我：「你的上帝佇叨位？」

¹¹ 我的心啊，你是按怎鬱卒， 是按怎佇我內面哼哼呻？ 著仰望上帝； 我猶久欲稱讚伊， 因為伊是我的拯救者，我的上帝。