Si-phian 41 - 現代台語譯本漢字版

破病的時的祈禱

大闢的詩，交互聖樂長。

¹ 看顧散赤人的人真有福氣！ 佇患難的日，上主會救伊。

² 上主會保守伊的性命， 互伊佇地上享福， 𣍐照對敵的心願將伊交互𪜶。

³ 伊倒佇病床，上主會扶持伊； 伊破病的時，上主會互伊閣𬦰起來。

⁴ 我曾講：「上主啊，我有得罪你， 求你憐憫我，醫治我。」

⁵ 我的對敵用歹話議論我，講： 「伊底時會死，伊的名底時會消失？」

⁶ 𪜶來看我攏講白賊話； 𪜶心存奸惡， 一下出去就四界給人講。

⁷ 所有怨恨我的人吱嘸吱茲議論我； 𪜶設計謀欲害我。

⁸ 𪜶講：「伊的身軀有致著絕症， 已經倒床𣍐閣起來。」

⁹ 我所信任，食我的飯，知己的朋友， 竟然攑腳踢我。

¹⁰ 上主啊，求你憐憫我， 互我閣𬦰起來報復𪜶。

¹¹ 我的對敵𣍐贏我， 我就知你意愛我。

¹² 因為我純全正直，你會扶持我， 互我永遠徛佇你的面前。

¹³ 願稱讚歸互上主 — 以色列的上帝， 對永遠到永遠！ 阿們！阿們！