Si-phian 40 - 現代台語譯本漢字版

頌讚的歌

大闢的詩，交互聖樂長。

¹ 我耐心聽候上主； 伊有俯耳孔聽我的哀求。

² 伊對死亡的陷坑，對土糜中給我扭起來； 伊互我徛佇石磐頂，互我的腳步穩固。

³ 伊教我吟新的詩，唱歌謳咾咱的上帝； 真多人看著就敬畏來信靠上主。

⁴ 專心信靠上主的人真有福氣！ 伊無拜偶像， 無及拜假神的人做夥。

⁵ 上主 — 我的上帝啊，你有為阮成就真多奇事； 啥人會當及你比？ 你為阮安排的計劃赫呢多， 欲講嘛講𣍐了。

⁶ 祭祀及禮物，你無合意； 燒化祭及贖罪祭，你嘛無愛。 你有開我的耳孔通聽，

⁷ 所以我應講：「我佇遮！ 你對我的指示攏記佇律法。

⁸ 我的上帝啊，你的旨意我歡喜聽趁； 你的律法佇我心內。」

⁹ 我佇大聚會中宣揚你公義的好消息； 上主啊，你知我欲一直宣揚。

¹⁰ 我毋曾將你的公義蓋密佇心內； 我已經有講起你的信實及救恩。 我毋曾佇大聚會中掩蓋你的慈愛及信實。

¹¹ 上主啊，求你毋通對我收回你的慈悲； 願你的慈愛及信實不時保守我。

¹² 因為有算𣍐了的災禍圍困我； 我的罪惡趇著我，互我的目睭𣍐看見； 諸個罪惡比我的頭毛較多； 我完全失去勇氣。

求幫贊的祈禱

¹³ 上主啊，求你歡喜拯救我； 上主啊，求你緊來幫贊我。

¹⁴ 願數想欲害我性命的人攏漏氣見笑； 願愛我受陷害的人敗退受凌辱。

¹⁵ 願對我講「乎，你慘啊」許個人， 因為見笑滅亡。

¹⁶ 願尋求你的人攏因為你歡喜快樂； 願欣慕你拯救的人時常講： 「著尊上主做大！」

¹⁷ 總是我困苦散赤； 主猶久數念我。 你是我的幫贊，我的拯救； 我的上帝啊，求你毋通延延。